今季好似有少少跌watt嘅基斯坦奴朗拿度（C朗），喺意甲歇冬重開即嚟個下馬威，喺祖雲達斯周一主場4:0大破卡利亞里場波連中三元，仲交咗個助攻畀希古恩入波，今場完全係佢個人騷。C朗今次「戴帽」，係佢職業生涯喺效力過嘅各大聯賽以嚟嘅第36次，亦係前年夏天轉投祖記後嘅首次，而之前試過喺英超、西甲同意甲都戴過帽嘅，就只有阿歷斯山齊士。
國際都大勝續排榜首
講番場波，其實祖記要到49分鐘先打破僵局，當時C朗把握對手回傳失誤，截到個波後扭埋對方門將射入空門，之後嗰球就要多謝保羅戴巴拿博到12碼，等佢可以操刀入第二粒。希古恩後備上場後入嗰球，就係C朗送直線，佢就入禁區射入，一分鐘後，C朗半單刀下射近柱得手，完成加盟記年半以嚟首個聯賽「帽子戲法」，亦係「山神」後第二位喺英超、西甲同意甲都成功戴帽嘅人，但兩個人嘅戴帽次數可以話一天一地，事關C朗喺聯賽連中三元已經去到36次，比起宿敵美斯仲多兩次，相反山神過去就只有四次連中三元。
C朗場內威水，但場外竟然俾人影到仲用緊上世代電子產物iPod Shuffle聽歌，認真懷舊。另外，佢賽後受訪時竟然一反常態，話戴帽係好開心，但就講到好似唔着重呢啲個人紀錄咁，話最重要係攞三分，可以等賽前排榜首嘅國際米蘭受吓壓。不過夜場出場嘅藍黑軍冇俾C朗嚇親，佢哋都有盧卡古省兩粒，作客3:1擊敗加度素領軍嘅拿玻里，以較佳得失球繼續壓住同得45分嘅祖記。
伊巴後備上陣冇料到
喺意甲射手榜僅次恩莫比尼嘅盧卡古，成為國際喺意甲改成三分制後，第6位連續2場入2球嘅球員，而且18場聯賽入14球，亦係國際球員嘅最佳入球紀錄，國際教練干地賽後受訪就話會打磨盧卡古，要佢成為鑽石。至於啱啱重返AC米蘭嘅伊巴謙莫域，回歸「地標」戰就相對冇C朗同盧卡古咁風光，後備上陣踢咗35分鐘冇波入，而球隊亦同森多利亞0:0收場，但佢賽後仲牙斬斬話如果之後入到波，要喺球迷面前好似神咁慶祝喎。
