在大角嘴的小小工作室，是陳康健教學生唱歌的地方，剛剛完約離開無綫的他，可以有更多時間上堂了。
十年前參加《超級巨聲》入行，一心想唱歌卻被安排拍劇做閒角，陳康健兩年前更發現患上罕見免疫系統疾病（IgG4）。在無綫營營役役，陳康健身在藍營心是黃，他說如今「無痛分手」是最佳時機，可以毫無代價做自己。
陳康健的舞台，是街頭busking。34歲的他說：「我呢啲中佬，又病，又跑唔郁，又食唔到彈，但係我做到一件你做唔到嘅嘢，就係唱歌！」
《十八》是他與年輕人的密碼，「一唱《十八》佢哋就會諗起梁天琦，呢個就係connect！歌詞已經可以同佢哋connect，密碼一樣呀！」兄弟爬山，致年輕人：「我唔想佢哋送頭呀……好難用兩、三句講得到囉！希望我哋所堅持嘅會有出路，我希望，我會用歌聲去support你哋！」
這天，在朗豪坊街頭，陳康健由《十八》開始，以《我的快樂時代》結束。
撰文：文嘉龍 攝影：黃雲慶 攝錄：彭志行
我唱歌為咗香港人
陳康健說，街頭的即時反應最真實，有一次他快閃busking，唱完後，有個男仔眼濕濕向他道謝。「佢話聽歌可以幫到佢好多，所以我就keep住都喺旺角busking。佢係其中一個告暴動罪嘅小朋友，佢叫我小心啲，有冇gear呀？我話唔使喇，我食唔到（彈）㗎，我有病呢，佢其實唔係要我衝，佢知道我做緊咩，佢覺得我喺度唱歌係為咗香港人，想用歌聲治癒一下。」
在狹窄的工作室，陳康健一直抱着結他訪問，他打了一個比喻，說自己就像《超時空要塞》的巴沙拿，「揸住架機，就逼啲人唱歌，跟住自己又會加血，就係《超時空要塞》嗰個崗位，嗰架機冇武器㗎，一射個飛彈黐住人哋個機械人，就係個喇叭嚟㗎，哈哈哈，勁低能！」
街頭表演時，眾生相。「我好肯定我有啲歌係好觸動，我唔唱𠵱家嘅政治歌，我唔將自己嘅busking政治化，甚至我有時遠處睇到，係真㗎，見到有啲popo，有啲防暴喺度，聽到我或者聽到我學生輪流唱，佢哋都喺度搖！佢哋都聽緊，我唔會喺佢哋面前唱『呀~死黑警~~』㗎嘛，咁樣會衝過嚟打我，哈哈！」
這場運動，他不在前線，他知道自己的崗位，「我做busking，我唔唱《榮光》，唔代表我個心唔喺嗰度，一樣（道理），你做食店，你可以好擺明去做（黃店），又可以淨係做好自己崗位，唔一定係食店，可能你揸的士都係，（理大）『廚房佬』咁樣，ok呀，非常之有智慧，我第一日聽佢講嗰句說話，就係《Titanic》嗰個比喻，你廚房咪揸鑊鏟囉，唱歌咪唱歌囉，你做好自己嗰嚿嘢！」
他相信口號不是白嗌的，「我成日都相信我用歌去connect人嘅時候，佢哋係會感覺得到，雖然速度係慢啲，哈哈哈，但係有㗎！『龍門』老闆講得好啱，唔係你貼咗『五大訴求 缺一不可』就係（黃），我相信唔止我一個係咁睇！」
我個崗位唔係出去衝
黃色代價，令他失去了做演唱會嘉賓的機會，「唔係發得多聲就代表有幾黃，坦白講，我都唔知我係淺黃定金黃，其實都係幫手推推！因為黃，我冇咗個演唱會嘉賓（機會），邊個我就唔講喇，唔好估喇，即係我呢啲，盡人事啦，冇乜影響力咪加油唱吓歌！」
之前身在無綫，有冇受壓？「佢（TVB）唔係好理，我相信係要賣多啲錢嗰啲人，佢先至要理，同埋我都唔撈咯！」對公司還是感恩的，「我唔覺得係咁差，可能新聞上面就真係差啲，因為我睇到㗎嘛，即係啱啱上網睇完，再睇TVB新聞，就會，吓？有少少咁樣囉！」
離開主因，也是健康問題，「我拍唔到劇，身體唔好，又冇歌唱……可能轉個頭有好嘅發展呢，咁幾好呀，我對無綫呢間公司又冇話唔開心，我反而係好感激嘅！」
兩年前發現患上罕見免疫系統疾病（IgG4），陳康健說：「好罕有㗎，一路喺度check cancer，𠝹粒淋巴去check，check完加埋嗰啲唔舒服嘅徵狀，先至可以講俾你聽係呢個病，確診都有啲難！西醫就係食類固醇，keep住食留意住有啲咩唔舒服，跟住飲啲好啲嘅水，再吸啲好啲嘅空氣，係好好多㗎！」
𠵱家好難有好空氣？「赤柱，我之前住赤柱，𠵱家赤柱都仲係好正，一啲都冇污染赤柱，大家如果仲想透吓就可以去赤柱！」
他說如果自己食中催淚彈應該幾大鑊，「呢個病通常手腳痛，最主要關節唔知點解痛，都係免疫有關！一係就屙囉，成日都屙，所以我都幾相信，我如果食一粒催淚彈都幾大件事，應該唔係好得！所以我個崗位就唔係出去衝，或者唔係出去『和你lunch』嗰隻！」
唔通上去食海底撈咩
衝不了，就在社交平台做文宣，busking打氣，「最主要support吓啲小朋友，聽到我啲歌，係會開心啲舒服啲，呢個就係我嘅崗位喇！其他嘢，唉，就算80萬人（12.8遊行）嗰日都唔安全，都要射（催淚彈），我都唔知可以講咩好，啲不反對通知書咪又係佢哋畀，畀完之後咪又係射，呢個問題一唔處理，其實都好難搞㗎！」
有區議會騷原本要找陳康健表演，「發生運動後推咗少少紅底建制嘅騷，嗰啲騷最多錢，推呀！」驚唔驚被封殺？「理鬼佢咩，不嬲都冇乜嘢做㗎啦，哈哈哈，做吓自己好過啦！」
大陸演出，更加不了，「我更加唔敢諗喇！我唔返大陸㗎𠵱家，我唔會咁笨，黐線，千祈唔好叫我返大陸，太笨喇呢件事，儍仔，返唔到落嚟，有咁嘅可能囉，或者扣留一段時間都有可能囉，又未必係拉你嘅，不過我又冇人喺嗰邊，唔通上去食『海底撈』咩！」
還是留在香港在街頭唱歌好了，每次的歌單都有必唱選擇，「我會唱《十八》囉，唱《海闊天空》呀、《光輝歲月》呀，我會唱《長城》，『蒙着耳朵……』，都幾大力㗎其實呢隻歌，加埋我會唱詩歌，呢個係我自己嘅崗位！」
在無綫十年，始終得不到一嘗出碟機會，有否不甘心？「有冇啲唔甘心呢？曾經一定有，我會覺得機會未到你，就冇辦法啦，都唔係你控制！刷吓你嘅存在感喺TVB係好重要嘅，如果有一隻歌畀你去唱，係可以幫到我，但係冇！」
未來全職教唱歌，少了無綫一份收入，其實分別也不大。「我一路都教唱歌，所以我唔係特別窮，正正常常！我一路教嘢都係support我唱歌，一路唱歌一路教嘢，一路busking一路教嘢，可能有一日又出隻歌睇吓啲反應啦，我一路都係想唱畀香港人聽，我都幾愛呢個地方，我都希望，尤其是年輕嘅一代，可以攞返佢哋應該有嘅嘢，佢哋失去咗太多喇，付出咗太多喇！我呢啲中佬，又病，又跑唔郁，又食唔到彈，但係我做到一件你做唔到嘅嘢，就係唱歌！香港人，獅子山下吖嘛，大家做自己嗰份啦！」
後記：朗豪坊的柴犬
訪問後陳康健又提着他的「架生」到朗豪坊busking，身為虔誠基督徒的他，詩歌也是他的歌單之一，「一啲我想唱俾大家聽嘅詩歌，跟住就係流行歌，咁樣loop囉，我又會唱吓《直到世界終結》，即係《男兒當入樽》嗰隻，每個人需要都唔同㗎，有啲聽詩歌ok，有啲要聽《十八》，聽《森林》呀，Mr.嗰隻！」
表演這天剛好是boxing day，陳康健更預備了一些可愛的柴犬公仔送給年輕學生們，《十八》一唱，又connect了！
