超齡上任接替王志民嘅香港中聯辦新主任駱惠寧，履新首日大搞懷柔，安排西環大樓外食風嘅傳媒入內採訪，送水又送高帽讚勤奮，刻意唔提止暴制亂，到底係咪綿裏針？放長雙眼就知，但有傳媒就發現，噚日駱惠寧站立見記者發言嗰五分鐘腳震震，唔通中聯辦大地震，都會令新舵手腳震？抑或有咁多勤奮嘅香港記者喺眼前，心情興奮到腳震？
評論員：未試過俾媒體包圍
話說噚日一眾傳媒內進中聯辦大樓後，梗係進佔最有利嘅中間位置影吓呢位新舵手，但原來企喺側邊嘅傳媒，反而因為另一種視覺，別有收穫。有企喺駱惠寧旁邊嘅港台記者喺twitter上載當時影片，片中的確見到駱惠寧雙腳輕微震動，而駱當時發言時，神情都有啲緊張，似乎要幫中共國家主席習近平收拾香港反送中殘局，即使做過兩省一哥，壓力真係唔可以睇小。
駱惠寧腳震新聞俾人放上網後，隨即網上瘋傳，台灣《自由時報》仲以「香港壓力大？駱惠寧就任中聯辦 被發現雙腳顫抖…… 」為題報道，仲引用評論員話駱惠寧係「第一次被眾多『挑釁』的媒體『包圍』」，呢個陣勢可能令駱惠寧有一啲緊張，擔心講錯嘢令北京不高興的話，隨時「有可能比王志民的下場更慘」。當然更加有人關心，佢係咪帶病在身？如果抱恙都要頂硬上接旨幫習總打仗，相信佢真係有過人之長而被看上咯。
李八方