阿仙奴喺周一英足盃第三圈憑小將雷斯尼爾遜一箭定江山，主場小勝英冠榜首列斯聯1:0晉級，但過程一啲都唔輕鬆，前鋒拿卡錫迪賽後就大爆領隊阿迪達半場喺更衣室發火，先令球隊起死回生。
列斯聯上半場有成15次射門，槍手就只得三次，真係難睇，好彩門將達米安馬天尼斯連番撲救，加上客軍又射中楣，結果換邊後槍手先脫胎換骨，雷斯尼爾遜喺55分鐘把握對方解圍失誤門前補射得手，幫槍手一球險勝。
Laca賽後講起贏波關鍵，話新帥阿迪達半場喺更衣室發嬲，鬧爆球員冇聽佢部署，而馬天尼斯亦補充阿迪達叫班球員要踢出獸性，仲話叫佢哋要好似狼咁跑。不過，今場最好彩係Laca冇因為沉唔住氣而領紅累全家，佢喺下半場疑似專登踢對方後腳，但VAR查證後都係走漏眼，唔怪得網民又插VAR。
英足盃第四圈同日抽埋籤，阿仙奴晉級後會作客般尼茅夫，但其他好似利物浦、曼城同車路士都抽中低組別對手，而曼聯同狼隊重賽後邊隊晉級，就有機會對屈福特。
