噚日多個區會首次開會，選出正副主席，幾乎指定嘅動作係通過要求政府回應五大訴求同追究警暴，仲動議一齊默哀悼念喺反送中抗爭犧牲嘅義士，但建制派同啲公務員似乎唔識尊重，有人離場抗議，有人索性坐喺度。
DQ刀手蔡亮拒默哀
其中喺油尖旺區，一開波負責主持會議嘅民政專員係惹火尤物，就係操刀DQ眾志黃之鋒參選區選嘅蔡亮，主席結果由獨立嘅林健民出任，林健民之後宣讀民主派聯署聲明，在場嘅建制派即時速逃。到民主派議員默哀嗰時，蔡亮亦拒絕站立。
呢區係話題選區，素人陳梓維擊敗咗上屆區會主席民建聯葉傲冬，當選後引嚟唔少爭議，由女友事件到聘請議助標準，究竟佢首次登場表現點呢？八方見佢有爭取機會發言，包括質疑活動宣傳單張成本同雜費過高，又質疑明明年年都搞同一活動，點解啲枱凳冇得重用而要重新購置，算係略嫌細眉細眼，但大家不妨睇多幾次佢表現先評價！陳梓維佢一邊開會仲一邊喺fb專頁做直播，但睇嘅人唔算多，反而唔少留言提佢專心啲開會，同埋記得寫筆記。