禮拜日嘅上水反水貨遊行俾警方腰斬，無差別大包圍截查市民時，仲迫市民好似戰俘咁跪地雙手放頭，同場又加插TK（teamkill）自己人，胡椒噴霧射到同袍肯出示委任證先收手。結果拉人嗰個唔使show委任證，俾人拉嗰個反而要show，市民都對此嘖嘖稱奇。
正當大家翹首以待，警察公共關係科高級警司Er Er Sir江永祥對於上水連串奇景有咩精闢見解，警方噚日居然高掛「免戰牌」，未有好似過往喺發生衝突嘅公眾活動後首個工作日召開記者會，臨陣笠水，令人相當惋惜。
警方上年9.11起將每日記者會改為按需要召開，今次更加龜縮自閉，到底係未度好劇本，定係西環新老細上任後新人事新作風？八方查詢原因，PPRB嘅回覆其實冇解釋點解，只係話按需要適時舉行記者會，警方亦會善用社交媒體，以靈活互動方式向社會傳達訊息喎。