邊個最驚美國通過嘅《香港人權與民主法案》？相信八方話係葉劉淑儀都冇乜人反對。姐姐噚日喺facebook貼咗篇長文，叫大家新一年唔好忘記人權法行住喺香港條頸，破壞力可以將香港推向一國一制喎！仲不斷話要制裁反人權官員唔係咁易，有網民奇怪因乜葉劉咁驚青？
葉劉喺fb長篇大論寫人權法會打擊香港國際關係同地位，到時只有更依賴中國，實際效果將香港推向一國一制，但等等先，建制派成日話祖國有優越制度，又係強大後盾，姐姐咁嫌棄一國一制，係咪想帶頭歧視中國先？這樣是不對的。
八方睇完篇文，查實都搵唔到點解關一國一制事，淨係聞到好大陣酸味，姐姐大聲疾呼話法案最辣之處係美帝可以搵埋英、澳、加、日、韓合力限制香港，但唔使八方多講，讀者都應該感受到姐姐真係好介意俾Solomon Yue點名制裁。都唔知佢唱衰國家係有心定無意，但肯定係進退失據嘅完美示範。見係新一年，八方贈葉劉一句──行得正企得正怕咩制裁。