早排有人發現屈臣氏疑似用水樽身印字為黃絲手足打氣，結果原來只係美麗的誤會，但好多網民仍一直相信長和資深顧問李嘉誠撐港人，所以即使小小事都有無限聯想，好似超人旗下屈臣氏疑似贊助知名黃店龍門冰室，又引起議論。
派蜂蜜雪梨水試飲
龍門冰室噚日喺facebook出po，話最近香港細菌病毒肆虐，「屈臣氏特別贊助我地（哋）20箱2公升蜂蜜雪梨水，今日先係銅鑼灣店，稍後會係另外5間分店，希望大家拎回家，祝身體健康，多謝您。」超人旗下公司贊助黃店，自然令一眾網民譁然。網民紛紛留言「多謝誠哥」，又大讚超人做「最強黃絲」，有人話要到屈臣氏買嘢，有人更為咗答謝超人，表示「我會記得準時返工㗎喇」。
不過出po大約一個鐘後，龍門冰室或者見「屈臣氏」三個字太耀眼，將「屈臣氏」改做「有心人」，雖然po已改，但睇編輯紀錄仍然掩蓋唔到「屈臣氏」呢個低調得嚟又高調嘅真相。
八方曾向龍門冰室老闆張俊傑查詢，確認贊助的確由屈臣氏送出，屈臣氏發言人就話，查實今次係產品試飲推廣活動，只係一般宣傳推廣，已經先後派發超過5,000樽飲品畀近百間餐飲商戶。換句話說，似乎又係大家諗多咗！
李八方