在陸羽飲茶，相熟女賓架S走過嚟打招呼，講聲「Happy New Year! Hopefully, 2020 will be much better。」新年人人都會咁講，點知餐廳R聽到，有回應：「Can it be getting worse?」賓架S笑笑口講：「Always think positively!」
餐廳R之苦口苦面，自有原因，佢間銅鑼灣新餐廳嘅生意陰晴不定，時好時壞，拉勻就係蝕食材，蝕人工，蝕租金。好似新年咁，大除夕夜，餐廳旺到爆，加埋午餐，做咗九萬銀生意，好不高興，點知到咗元旦日，全日冷清清，只做到三千大元，啲新鮮食材立即變成廚餘，喊都無謂。點解會咁，因餐廳位於銅鑼灣一間新型大廈，離開維園只有五分鐘腳程，每有遊行，樓下就逼到水洩不通，食客避開惟恐不及。餐廳R不斷向業主反映，要求減租，業主話大廈位置優越，屬於prime site，好難減租，故此餐廳R已經愁足幾個月。
日前遇到店舖專業經紀W，佢話因有持續社會運動，工商舖工商業大廈成交停滯，冇單開，好彩集團有做埋移民顧問，現在都幾依賴海外物業買賣作為主要收入來源，最多顧客查詢投資移民或第二家居（second home）計劃，有錢嘅問西班牙、葡萄牙；中產嘅問馬來西亞、泰國；亦有不少普通人要去大灣區二線城市買樓（三百萬元買千幾呎），如果冇呢類生意就要食穀種咯。
經紀W話，去年六月前之所謂prime site（銅鑼灣、旺角、彌敦道）已變成災區，店舖租金跌三成都冇承接力，相反地區性屋邨就生意興旺，例如佢家住荃灣一個屋邨，區內酒樓生意從未試過咁好，星期日晚上要分六點、八點兩場訂位，老闆笑到四萬咁口，但銅鑼灣食肆就受重傷。
再譬如世界貿易中心嘅老牌淮揚菜「綠楊邨」已經執咗，左丁山對餐廳R講：「不如你去屋邨地段開餐廳，以作對沖，唔好集中在中環灣仔銅鑼灣！」餐廳R苦笑：「捱得過呢個寒冬先至講！」餐廳大部份不景，又未必衰得晒，如經營食肆嘅食評家劉健威講，過往飲食業膨脹過速，工人難請，導致廚房及侍應水平降低，行業高峰時期估計全行缺乏一萬二千個工人，現在因環境不佳，作自然調整，或者全行嘅飲食製作水平及服務態度都有改善，希望本身係一件好事。