香港人喺警暴伴隨下踏入2020年，有popo用催淚彈同大濫捕同大家開年，鍵戰廢老、政治閒人梁振英亦不甘寂寞，喺社交網站指民陣搞示威遊行「次次呃秤」，提出神邏輯嚟反駁，結果成為咗連登仔周末嘅茶餘飯後笑料。
元旦遊行俾popo粗暴腰斬，民陣當日就用已點算嘅數字同對比上年6.9遊行嘅情況，公佈有不少於103萬人參與遊行，點知689睇唔順眼，質疑成個香港島人口總數都只係123萬，話如果有103萬人上街，幾乎等於港島所有人都上街，反問「有可能嗎？」仲話呢個係「簡單的常識」，指摘民陣一次又一次呃香港人。
連登仔瘋狂恥笑
所謂「人一藍，腦就殘」，八方估唔到呢個都市傳說會有個咁完美嘅示範。須知道過去每年大除夕政府都宣佈有幾十萬人喺維港兩岸睇煙花倒數，唔通又同油尖旺區人口有關？如果港島區遊行只係關港島事，咁班popo當日就唔使喺九龍、新界多處無理截車搜查啦！
難怪連登網民瘋狂恥笑689，足以秒殺嘅金句不能盡錄：「唔識坐車過海？」、「香港人口不足800萬，何來幾千萬旅客？」、「紅磡人口得1.4萬人，紅館開show坐到1.2萬人？」、「屋企得6個人，新年點解會成屋拜年親戚？」亦因為689將去港島講到要出入境咁，於是大家仲發現，佢「港獨之父」呢個名，原來正解係「港島獨立之父」囉。
李八方