中國史上第一人！上禮拜六西甲嘅加泰隆尼亞打吡，愛斯賓奴主場迎戰榜首嘅巴塞隆拿，靠嚟自中國嘅武磊臨完場前乖巧入楔射入扳平一球，為愛奴爭到寶貴一分。武球王就成為咗中國史上第一個射破巴塞大門嘅中國人，中國傳媒同網民就當然大「吹」特「吹」，更指武球王表現完勝美斯，真係加泰球王喎。
後備入替建功仍居榜尾
歇冬前依然排名聯賽榜尾嘅愛斯賓奴，之前就再炒教練柏保路馬捷恩，換上巴塞名宿艾比拿度執教，表現亦果然有起色。開波23分鐘中場大衛盧比斯施華嘅頭槌入波就幫主隊領先上半場，不過換邊之後蘇亞雷斯同之前同球會鬧翻嘅維達爾各建一功，反超2:1。
但一切就由武磊74分鐘後備入替後徹底改變，1分鐘後巴塞中場法蘭基迪莊就因為掹衫拎第2張黃牌被罰出場。到臨完場前兩分鐘，武磊接應馬迪亞斯華加斯嘅傳球直線突入禁區，之後冷靜近門射入扳平一球，成功為愛奴搶到一分。
「速度壓美斯僅次C朗」
武球王對巴塞入波後，成個中國嘅網路世界當然興奮到癲，不論傳媒抑或網民都用自己獨特方式「吹奏」武磊。其中今仗武磊嘅最高衝刺速度係32.1公里，更勝對手主將美斯嘅31.4公里，騰訊嘅報道就指「可以看出啟動的那一下直接把所有的巴塞後衞都已經甩在了身後，這就是『中國速度』。太讓人意想不到了。」仲話武磊嘅衝刺速度比起美斯快，只係比基斯坦奴朗拿度（C朗）巔𥧌嘅33.6公里慢少少，得出「壓美斯僅次巔𥧌C朗」嘅結論，就好似成個球壇得佢哋三個人咁。
一眾中國網民賽後全部都翻晒牆去「佔領」愛斯賓奴嘅twitter，吹奏武球王嘅「牛逼」。例如「今夜加泰隆尼亞只有一個球王！」、「我覺得我們可以說是加泰隆尼亞老大」呢啲都係基本，仲有讚美武磊令中國人面上有光嘅「武磊牛逼，讓我們中國人驕傲一把」，甚或「創造歷史的中國球員！！！武磊niubility（牛逼）！！比那幫白斬雞強多了！」等帶有種族色彩嘅留言應有盡有。不過，雖然愛奴拎到一分，但榜尾位置仲坐得好穩，武球王仲要繼續努力帶領球隊護級呀！
