皇家馬德里喺上個禮拜六歇冬後首輪西甲聯賽，作客以3:0擊敗基達菲，連和三場後終於重響勝鼓，而且藉住巴塞隆拿同日對愛斯賓奴打和2:2失分，俾中國球王武磊壞好事，得以喺聯賽榜再追到同對手同得40分，僅輸得失球差排第二。講番呢場波，皇馬半場已靠華拉尼頂入領先，換邊後再有華拉尼入多粒同莫迪歷入球，幫助球隊全取三分，但賽後被大讚嘅反而係門將泰拔高圖爾斯，皆因佢喺今場波做咗四次精采撲救。不過，「銀河艦隊」仍積極希望喺一月轉會窗強化陣容，據報好快就會以3,000萬歐元簽入法林明高17歲新星雷連亞卡維奴，同時可能將占士洛迪古斯借往前主帥安察洛堤領軍嘅英超球隊愛華頓。