三個星期前，在遮打道近香港會前面斑馬線等過馬路，偶然橫望，左邊一位外國人赫然就係40年前之舊同事，加拿大賓架P。賓架P二十幾歲來咗香港，一見鍾情，一於唔走，銀行調佢返加拿大，咪遞辭職信囉，如是者留港多年，已成為香港人，發咗達嘞，當然冇盛智文咁發，亦冇好似盛智文咁放棄加拿大籍。如何發達，一字咁淺，離開銀行，與東南亞資本合作成立金融公司，後來東南亞資金退出，佢獨自經營，進入千禧年代之後，有中資吼中，咪沽之哉，印印腳嘆世界囉。呢類故事，香港有不少，總之配合形勢，適逢其會，得中資買盤，搞掂！
賓架P話大家不見多年，竟然在斑馬線前相遇，一於要約時間食飯，一約就係三星期過年之後，大家先至可以夾到時間吃午餐，原來佢去慣威靈頓街Gradini，打個電話就有位，一於就晒佢。
如期去到Gradini，咦，幾清靜喎，與幾年前一位難求狀況，難以相比；記得2014年之時，秘書V訂位，要提早兩個星期也。不過呢幾年來，中環同類餐廳增加咗六七間，競爭大，加上現時環境，生意係難做一啲嘅喇。賓架P一開聲就問如何解決目前社會不安，有無好計？你估左丁山係林鄭咩，邊有資格講。賓架P慨嘆在港多年，未見過一個政府如此一籌莫展，等運到。左丁山話：「可能係北京問題，中央政府未有決定，林鄭邊會敢主動出擊，或者等緊命令呢？」賓架P不以為然，佢間公司賣咗畀中資之後，不時與北方人士見面，人地問佢關於國際金融嘅意見，佢就問人對香港目前問題嘅意見，得到嘅印象係，內地金融人士實際上不知如何是好，唯有採取內地最「政治安全」嘅方法，即寧左勿右，一於鎮壓（即止暴制亂）咗先。北方來客從來以為香港人最重視搵錢，銀紙掛帥，點知呢趟香港人（根據不同民意調查結果）竟然寧願犧牲搵銀機會都要支持「反送中」，唔講銀紙，講心，即時令內地人大惑不解！
賓架P個仔眨吓眼已大學畢業，在外資銀行工作，向賓架P報告，華人同學畢業後嘅第一份人工，同二三十年前差不多，回歸後似乎未見新人薪水有向上調整過，賓架P嘆一聲：「此乃青年人不滿現狀之第一個理由。」左丁山唯有苦笑，1990年（嘩，已經係30年前），左丁山有權聘請新畢業記者，給予薪水近萬元，2020年會有幾多呢，頂多係萬零，諗吓都覺得不可思議。兩位ex賓架吃飯，傾起舊事，總覺得我地年青時搵工跳槽好輕鬆，今日漸變廢老，對年青人無謂諸多批評咯。