66歲的顧美華，拍第一部電影是文藝片《似水流年》，對手是影后斯琴高娃。33歲離婚後入行，兩女之母得天獨厚的顧美華，當年被喻為非池中物，更平地一聲雷奪最佳新演員獎。一晃眼，三十多年過去，顧美華沒有預計的星途燦爛。她說從來沒有事業心，接戲視乎導演和對手，產量極少，至今只拍了二十多部電影。有第二段婚姻的她，婚後跟美國長大的丈夫在異鄉生活，一直認為夫妻需要徹底溝通，顧美華笑言到她這個年紀，不能不承認夫妻關係難有一致共識。
這些年，顧美華拍戲以外，在美國或香港，隨遇而安地繼續生活。惟有在09年，年半間先後失去胞妹和父母三個至親，她開始更加珍惜眼前人。
撰文：壹週刊 攝影：蕭敬漁
夜闌人靜想起的……
09年，她在一年半內，經歷胞妹自殺、父母因病離世，有半年時間，她沒法見人接觸外界；同樣，跟她合作過的馬浚偉，對母親病逝，久久不能釋懷，在很多年以後，每提起都有難言傷痛。
相似經歷的同路人，撮合了他們合作舞台劇和電影。馬浚偉憑電影寄意，將結局改寫，母親臨終前鼓勵他，不要自責好好生活。顧美華說拍完自己的戲份後，也未能完全將傷痛帶走。
放不低喪親痛
「這個問題視乎個人，每個人都有親人，有啲人一世都唔可以接受。我有同學，丈夫很早時離開了，當時佢只有二十幾歲，但到今日呢個年紀，仍然未放得低，我們每個人都有爸媽、親人，小時候，我覺得天下最恐怖嘅事，就是媽媽離開我們，到媽媽真的走了，表面上，我好似冇問題，畢竟她已經年老，我又已經服侍到她離開。但到夜闌人靜時，我仍會想，那年那日，我點解咁樣做？我點解要這樣回答她？好多人話係情緒病，或者你可以標籤係情緒病，但係可以分輕重，有啲人可以當冇事，但有啲人會如影隨形。有人講父母同子女係『骨肉』關係，一直相連。你問我幾時釋懷？我話你知，係唔能夠放低。」她說。
但，假設發生在自己的事情，都有我們要學習的地方，顧美華已有所悟，愛惜身邊人，她認為只要是適當時候，都應該好好表達。
「我會諗，今日見過呢位朋友，唔知聽日係咪可以再見，所以就算唔係自己仔女，同朋友相處，我都會好珍惜每一刻。不過，我現在只會花心思在屋企人身上，佢哋（兩個女兒）唔需要我擔心，但有時自己掛住某個人，好似大孫已經20歲，會諗佢喺美國生活得好唔好？另外一個孫仔喺英國，唔知佢過成點？我亦會飛去探佢哋。」她說。
沒有人完全適合另一個人
入行初，有關她第一段婚姻，有這樣的報道：顧美華需要跟伴侶有靈性溝通，她因而與第一任丈夫離婚。她自言，隨着經歷時間過去，對另一半的想法改變了很多。
「婚姻從來都係世界上最難討論嘅題目，年輕結婚，離婚率當然會高好多，經過咁多年，大家互相遷就，世界唔會有一個人，係完全適合自己，全部都要靠自己調整。」顧美華不再執着，她跟第二任丈夫以更自由文明方式相處。
早慣與夫分隔兩地
「我有半年時間喺美國，其他日子就留喺香港。老公喺美國長大，所以佢習慣嗰邊生活，應該咁講，我去美國就係探佢，佢有時候就會嚟探我。我哋兩個仲係一齊，不過咁嘅生活方式比較好，基本上我哋每日都會通電話。」她說。
或許都是一廂情願，以為《似水流年》的顧美華，一直跟娛樂圈若即若離，總帶點神秘。她自說自己其實一點也不「文藝」，在香港，顧美華會坐港鐵，去街巿買餸，然後回家煮飯，相約朋友飲茶睇戲，是個平凡不過的女人。
後記：沒有預期的結果
顧美華對《似水流年》的成功不太在意，因她當年還不清楚電影是甚麼一回事。直至05年，在上海拍了《美麗上海》，由專拍女性電影的彭小蓮執導，她方開始享受到演戲的樂趣，更拿了她人生第一個影后獎。
「你問我邊套戲印象比較深刻，應該係呢部戲，有幸當年喺國際電影節，憑呢部戲奪得影后。呢部戲對手好強勁，其中一位係話劇團團長趙有亮，另一位係喺北京好紅的馮遠征，仲有王祖賢，佢好耐冇拍戲。飾演媽媽係《城南舊事》鄭振瑤，每位演技都非常出色。其實我哋只不過係拍一套平實電影，但拍得好開心，我從來冇去預計結果，但過程開心先係重要。」她說。
