現年66歲的菲律賓歌手丁馬卡度，1977年參加麗的電視歌唱比賽入行。闊別香港樂壇二十多年，早前返港為錄影節目時，撞正香港逆權運動，他大叫心痛：「我對香港嘅情況感到好驚訝，最慘件事好複雜，乜都幫唔到，我只希望和平快啲返嚟，因為世界上只有一個香港。」
丁馬卡度當年因為愛唱歌，大學畢業後來港參加歌唱比賽，當年力壓哥哥張國榮奪冠，之後簽約亞視。70年代末過檔無綫，因擁有一身肌肉，經常被安排他性感演出：「當年為TVB拍特輯，包括葉麗儀、林子祥、露雲娜同我，有一幕浴缸戲喺酒店拍攝，佢哋要我邊沖涼邊唱情歌，導演淨係畀條毛巾我遮下體，連泳褲打底都冇。80年代初我同陳潔靈都有一場性感表演，我要着住肉色泳褲跳舞，效果好似冇着。」
讚拍檔進取
當年有人利誘拍情慾片，丁馬卡度坦言不考慮：「我形象好健康，而且我會尊重自己嘅身體。」他在1979年與甄妮合作音樂特輯《夏日戀情》後成為好友，甄妮多次找他登台合唱，丁馬卡度大讚對方身材好：「佢好進取，而且好識展示優點，哈哈哈！你知我講乜！」
教高官儀態
1985年離開無綫後，丁馬卡度先到溫哥華發展，後來返家鄉菲律賓：「我喺儀態學校任教，專教當地高官儀態，尤其係講嘢技巧、形象等等。𠵱家每年仲會幫軍隊大型活動設計舞台，令我好有成功感。」
談到香港逾半年的逆權運動，丁馬卡度坦言感到好驚訝：「香港人經過好多年努力先至有𠵱家嘅成果，經濟穩步上揚，近期發生呢件事，令我心都淌血。最慘件事好複雜，乜都幫唔到。」他希望和平快些到來。
撰文︰祖李
攝影：林德雄