新年前有位退休老友B教路，對左丁山講：「我哋退咗休就要睇住啲錢點樣使，要物有所值。以前打工有浮動收入，經濟好嗰陣時，公司賺錢，我有花紅，即管使大咗，冇問題之至。現在係固定收入，靠股息，iBond及Silver Bond嘅債息，冇乜增加嘅可能性，每年收入有幾多一眼睇晒，用錢梗係要小心啲！」講咁多，即係有乜慳錢秘笈？
老友B話：「嗱！知你日日揸車到中環，泊車在中環中心或IFC，每日停車費，過西隧費你有冇計過幾多錢呀？你泊架車在圓方，坐東涌綫過海，就慳番不少啦，知道冇！」以前未諗過噃，即刻去試吓。
呢日泊車在圓方8小時，停車場費176元（每小時22元），搭地鐵過海，來回4元（兩蚊一程），共180元一天。如泊在IFC，每小時33元，中環中心每小時38元，西隧來回費150元，總共414至454元，嘩！每日慳起碼234元，一星期五天就是1170元，一個月28天慳4680元，一年56160元，換算等於買入一萬四千股滙豐嘅股息，買入萬四股滙豐要84至85萬元。計完條婆乸數，嚇咗一驚，話番畀老友B聽，老友B笑瞇瞇咁講：「我一早識計呢條數，你老哥唔志在之嘛！依家塞咗萬四股滙豐入你袋，應該請番我一餐啦。」
咪講笑，一於以後都係咁樣做。嗰日停好架車，就行去搭地鐵東涌綫往中環，點知碰到yuppie阿Paul，阿Paul話：「咁啱撞到你，祝你有一個愉快的2020年，我要返加拿大嘞，每年只會留在加拿大大約一百日，老婆仔女就住在溫哥華！」咦！咪即係做「太空人」？左丁山一輩，有不少在1980年代做太空人，坐移民監，為求一個加拿大護照，想不到30幾年後又見到「太空人」。阿Paul話：「我爸爸咪做過太空人囉！當年佢帶我哋移民，我大學畢業後回流，現在香港係咁嘅情況，兩公婆商量過，由佢陪仔女在溫哥華讀書，我留在香港搏殺，就似阿爸當年情況，只不過現在已經有咗加拿大護照，過程容易好多。」阿Paul呢類yuppie生活無憂，住在半山區，一家快樂，何解突然要做太空人，都無謂問咁多咯，大家心照。還有27年便到2047，彭博已經出一篇報導Will 2047 Be the End of Hong Kong as We Know It？睇見標題就唔開胃，又好無奈。但事實上，國際人士係有如此想法。阿Paul爸爸帶阿Paul入加拿大籍，現在輪到佢為仔女籌謀。但佢亦有憂心，就係驚仔女到加拿大後，don't like中文，預備將屋企所有中文書，搬去溫哥華新屋，希望仔女肯讀。咁樣未免一廂情願，Paul話做得幾多得幾多喎！