瑞典神鋒伊巴謙莫域曾經講過，家陣評述界好多曼聯名宿揸旗，以加利尼維利、史高斯同里奧費迪南為首嘅呢班講波佬，周不時都鍾意插前球會，過火言論有時都幾影響隊內士氣。最近就再有剛加入足球評述員界別嘅尹佩斯（RVP）辣㷫領隊蘇斯克查，搞到呢位好好先生喺記招發晒老脾還擊，兩代曾經身穿球隊20號波衫嘅名宿竟然隔空「開戰」！
寸RVP着舊20號波衫
尹佬同蘇B嘅罵戰緣於曼聯元旦作客0:2不敵阿仙奴，RVP當時喺電視台直播期間，對蘇B賽後仲笑笑口受訪有微言；雖然佢話知道蘇B係個好人，但認為既然球隊輸波就唔應該笑，仲話蘇B份人就係缺乏會嬲嗰一面，呢個亦係佢麾下嘅紅魔缺乏嘅元素。點知RVP呢句說話唔知係咪點醒咗蘇B，即刻展現畀對方睇佢都識發嬲嘅。
蘇B喺記者會上咁樣回應RVP嘅評論：「首先，我唔識佢，佢都唔識我。所以我唔認為佢有資格質疑我，同時我亦唔打算有任何改變。」蘇B早過尹佩斯好多出道，踢咗紅魔11年後，喺2007年掛靴，而後者嗰陣仲踢緊阿仙奴，而且只係出咗道六年左右，直至12年先轉投紅魔。蘇B之後就咁樣反寸對方：「尹佩斯喺我身上得到嘅，大概就只得嗰件20號波衫。」未知RVP聽完蘇B咁講，會唔會又作出反擊呢？
插拉奧拿冇大冇細
另外，蘇B除咗向RVP開火，亦將槍頭對準保羅普巴嘅經理人拉奧拿。拉奧拿早前又開腔質疑紅魔糟蹋普巴，所以蘇B既然鬧開，就鬧埋呢位成日同紅魔過唔去嘅經理人：「如果有問題，我會自己搵普巴傾，所以我唔認為要搵其他人講，而其他人亦唔應該隨便亂講。大家應該搞清楚個概念先，係球員聘請經理人，球員係屬於球會嘅，唔係屬於經理人。」
據講曼聯係因為知道拉奧拿麻煩，上月想購買佢旗下客仔，挪威超新星艾寧夏蘭特嗰陣，就諗住繞過拉奧拿，改同當年俾堅尼踢到收山嘅佢老竇傾，皆因「老夏蘭特」都有權干預阿仔嘅轉會，點知都係失敗，對方最後轉投多蒙特。