向海嵐是1998年香港小姐四料冠軍，卸任後拍劇當上女主角，之後暫別娛樂圈北上做珠寶生意，幾年前才回流返港。近日她以港姐身份重現幕前，分享選美時點滴，但合作單位就變成ViuTV的旅遊節目《香港親善小姐》，她更直言選美改變了自己的人生。
撰文：卓寶花
攝影：沈健程
現年45歲的向海嵐，距離當年選美已經21年，但當眾穿泳衣的畫面仍歷歷在目，她說：「決賽上台嗰件有啲連身叫一件頭，但好多窿，見記者就三點式，當時趕出場冇諗咁多，冇機會畀自己好好照鏡就要出去，一生都會記住呢個畫面。選美對自己人生好大轉變，當年我係20號，似一個終生號碼，有啲朋友都仲叫我20號。」
似選藝員花旦
大學時向海嵐就讀當年有「港姐學府」之稱的英屬哥倫比亞大學（UBC），不少師姐師妹參選港姐及華裔小姐都成功闖關，到香港娛樂圈發展，包括2003年亞軍楊洛婷、2007年冠軍張嘉兒及2004年華姐冠軍鍾嘉欣等。向海嵐說：「1997年冠軍係翁嘉穗，我哋喺加拿大係同學，我識佢知佢冇關係去選，真係選到，到第二年我就去試吓。」她續說：「不過報名時我諗選美梗係有黑幕，交張表格點會叫你去面試，點知真係叫我去，我諗去見吓又點會畀你入圍，喺溫哥華面試完後兩、三日就通知我入圍，有張機票畀我返香港參選。當時純粹諗冇嘢做返嚟玩三個月，點知樣樣都過關。」
對於近年港姐形象不再像以往大方得體，言行作風變得大膽，向海嵐認同：「係唔同咗，我哋以前年代香港小姐係好有一個模式好受保護，當選頭一年只係做港姐職務，履行完港姐職務先加入劇組，但𠵱家一選就接觸唔同工作，做主持、拍劇等，變咗港姐形象冇咁鮮明，似選藝員同花旦。我哋以前好代表香港，旅遊發展局、貿易發展局會請我哋去做一啲事情推動香港，又會代表香港去參加外地選美，我好難忘代表香港去選環球小姐，呢啲真係細細個睇電視睇到嘅選美。」
信自己最穩陣
向海嵐現在同時有經營珠寶門巿生意，主要售賣翡翠，她希望將翡翠年輕化。對於幾乎將所有時間放在工作及生意上，感情仍然空白，她說：「幾enjoy一個人生活，鍾意做乜就做乜，冇壓力。」樂於靠自己生活，不需依靠男人，她續說：「有啲嘢要靠自己，靠人信唔過，自己先係最穩陣。身邊啲朋友成日話我好似好柔弱，其實我係一個男人，可以自己照顧自己生活，佢哋叫我唔好咁強硬，冇人埋到你身。」
髮型：Matt Chiu of Xenter
場地提供：Party Huh
