請允許我倚熟賣熟，以老巴黎聲氣教你如何應付罷工，雖然同樣招式在香港或者不合用，來到這個交通癱瘓如家常便飯的城市，肯定止得吓咳。最最重要的，千萬不要恃住身懷黃大仙靈符，就以為一定會獲得額外保佑，須知道氣候迥異加上翻譯迷失，再犀利的外國超自然勢力也可能短暫失效，虎落平陽一籌莫展。地鐵宣佈局部通車，且勿高興得太早，就算真的恢復三四成服務，福星高照的畫面未必由閣下當主角，免得過的話不要以身試法。能夠步行就步行，否則巴士比較保險，起碼出現狀況有即刻跳車的選擇，卡在兩個地鐵站之間動彈不得那種痛苦，真係諗起都一額汗。但有些情況則不妨博一博，譬如前兩天從阿姆斯特丹搭火車打道回府，晚上七點抵達北方車站，我就覺得搭B線快車往南行應該冇問題，事關路線斷為兩截，該站成了終點站，上車不必打崩頭。
量入為出的稿匠平日慳得就慳，非常時期卻努力向土豪學習，一洗一毛不拔頹風。上月飛紐約，正值罷工進入高潮，查清楚法航長途機不受影響，先鬆了一口氣，但下午一時起飛，最遲十一點到機場，保守估計，公路大塞車，搭的士至少要三小時，還要多預一粒鐘截車，表示早上七點就要出門。嘩，太牙煙了，習慣日上三竿才起床的夜貓子，校定兩個鬧鐘都瞓得唔安寧，趕頭趕命既死細胞，也有誤機期風險，於是把心一橫，決定先一晚去機場旅館過夜，第二朝施施然登機。回程搭夜機，翌日早上九點到埗，剛好是最繁忙時刻，已經計劃必要時又再開房，幸好起飛延誤個半鐘，十點零十一點交通暢順，阿彌陀佛。