剛過去嘅區議會選舉，民主黨合共取得91個區議會議席，成為咗區議會入面嘅第一大黨，不過新任區議員只係履新幾日，民主黨就傳出壞消息。民主黨屯門區議員朱順雅噚日突然喺facebook宣佈，佢已經退出民主黨，呢個消息令好多人好意外，而自2000年起出任兆置區議員嘅林頌鎧亦已同時退黨，仲有人同八方講，民主黨新界西仲未震完，唔排除仲有其他區議員陸續宣佈退黨，今次民主黨有排煩。
傳同黨友有嫌隙
朱順雅噚日喺facebook話，自1997年大學畢業加入民主黨至今已經22年，雖然對民主黨有深厚情誼，但喺服務嘅地區「始終難以和黨友建立有效的合作」，所以先無奈退出民主黨，又特意感謝喺屯門同新西服務多年嘅何俊仁對佢嘅照顧。
據知，朱順雅同屯門區黨友素有嫌隙，多次提出但仍未能解決。今屆區選民主派喺屯門區大勝，一度有素人推薦朱順雅擔任主席，不過最後協調結果就由民主黨陳樹英做主席，唔知退黨係咪同主席之爭有關。《蘋果》曾就事件向朱順雅查詢，但未有人接聽。