噚日踏入2020年第一日，除咗維園有民陣嘅元旦大遊行，繼續為香港爭取民主、自由之外，每年一度喺淺水灣舉行嘅元旦冬泳，亦吸引超過2,000市民參加，今年最唔同嘅係，唔少泳手帶埋返送中、查警暴嘅政治標語參賽，仲有人帶埋gear落水，希望五大訴求喺新一年能一一達成。
用另類方法支持示威者
元旦冬泳賽事由香港拯溺總會舉辦，今年踏入第44屆，泳手年齡介乎6歲至90歲，賽事以分組形式出發，由淺水灣泳灘游至淺水灣石堤，全程約800米。今年有泳手表達訴求，手持黑底白字嘅「光復香港時代革命」旗幟參賽，仲戴頭盔同防毒面具等裝備落水比賽。
其中一位full gear嘅泳手鄧先生話已經游咗20年元旦泳，佢有個女，平日抗爭唔可以行得太前，但想支持示威者，所以就用自己方法表達，仲話冇諗過原來上晒gear游水真係幾辛苦同埋痛苦㗎！對於香港前景有乜希望，佢同絕大多數香港人一樣話：「光復香港，時代革命！五大訴求，缺一不可！希望林鄭會聽到我哋嘅意見。」日前見警察時仲聲大大話有市民支持佢同差人嘅777，唔知聽到真正民意未呢？
至於今年元旦冬泳賽果，最快衝過終點嘅係25歲潘正亮，而女子組最快泳手就係李恆楓。
李八方