傳媒都叫她蘇小姐。她是梅艷芳國際歌迷會會長，由歌迷變成梅艷芳身邊最貼身的人，每年12月30日，16年來她都風雨不改為人生唯一偶像辦下各式紀念活動，前日就放映了一場梅艷芳與成龍主演的《奇蹟》。
「唔希望大家睇完喊晒，唔想𠵱家都仲係咁樣，唔好太過傷感喇！套戲裏面呢，梅姐又着好多靚衫，有歌有舞！係啦，希望大家睇完個心會舒服啲！」蘇小姐說。
不再傷感，也有遺憾。梅艷芳在醫院的最後日子，蘇小姐沒有抓緊機會訴心事，「唔知點解，可能大家心裏面係有嘢想講，但係又……講唔出口囉……」
最後的對話是這樣的，「有一晚，佢好奇怪，突然間無端端講，你記唔記得以前細個有一隻細路仔唱民謠嘅歌呀，我話咩歌呀，佢話，『氹氹轉，菊花園……』」
這位「香港的女兒」，16年過去了，香港人對她已淡忘？「我覺得冇淡忘到，始終你一講起，譬如以前六四呀民運各樣，甚至攞𠵱家呢個時候（情況），你以前做過啲咩嘢，為社會為香港又好，香港人係會記得嘅！」
撰文：文嘉龍
攝影：袁筱儀
場地提供：銅鑼灣迷你酒店
有些日子，人民不會忘記。像蘇小姐，16年前的11月27日這一天，是梅艷芳入住養和醫院的日子，蘇小姐在梅艷芳的病房中「加床」，一直陪到她最後。
最後唱出的童謠
「30號就走，佢係11月27號入醫院。因為11月佢去完日本，拍嗰個廣告（現代美容），一落機第二日已經好唔舒服，可能太凍，好早就要返酒店休息，跟住縮短咗拍攝，27號返香港，返咗香港就打畀醫生，醫生話你最好入醫院啦，咁就返屋企搞掂晒啲行李，食個飯梳洗完執埋啲嘢，半夜我哋陪佢入醫院。」
在醫院最後這一個月，心底話卻不敢盡訴，「大家個心係有嘢想講，但係又講唔出口，我就真係講唔出囉，咪當冇事繼續照顧佢。有一晚，佢好奇怪，突然間無端端講，你記唔記得以前細個有一隻細路仔唱民謠嘅歌呀，我話咩歌呀，佢話，『氹氹轉，菊花園……』唱嗰啲歌囉，突然間我諗，吓，點解咁樣嘅，我都唔敢望住佢，我擰歪面忍唔住啲眼淚，又唔想畀佢見到我喊。」
蘇小姐到今天回想起那情景，仍然深刻，「你又要忍住唔好喊，你唔可以喺佢面前喊住嚟講，會影響佢，佢亦都會唔捨得！後尾我其實有同佢講，『阿姐，唔使掛住我哋㗎，我哋就永遠都會掛住你，你開開心心，去第二個地方』，我咁樣同佢講，唔知聽唔聽到㗎，因為都已經打咗針昏迷，last嗰晚全部啲artist都嚟晒，我唔知點解下晝開始就傳出嚟，啲人就開始嚟，佢哋嚟到嘅時候，佢（梅）已經打咗針。」
梅艷芳離世16年，蘇小姐與偶像相伴的日子，剛好也是16年，她由1987年《胭脂扣》時期開始迷上梅艷芳。「《胭脂扣》嗰時開始叫做『追星』，有機會就去探班，可能嗰時又後生啩，唔使瞓咁，有得見到偶像係好開心㗎，慢慢熟落咗就可以同佢傾吓偈。」
食客三千 芳心寂寞
由歌迷變會長再到梅艷芳身邊人，好多人以為蘇小姐是受薪助手，她說：「其實係誤會，嗰時好多記者都以為我係幫佢做嘢，以為我係其中一個助手，後尾熟咗先知我係做歌迷會，即係跟出跟入咁囉！以前佢都試過請一個女助手，但唔知點解佢請男助手多，因為佢話男助手可以保護吓，同埋擔得抬得，拎行李都會方便！」
蘇小姐在早年的訪問中，曾說過待梅艷芳比待自己家人更好，「有陣時我屋企人都攞返呢句嘢出嚟講！唔係話同屋企人唔好，嗰隻close係會唔同嘅，家人始終就係家人，但係梅姐始終又唔係親戚關係，唔知點解會好close，你自自然然會對佢好。講真，有時屋企人有事甚至走，都係要住咁耐醫院，我都衰，冇話一晚喺度（醫院）瞓過，但係梅姐嗰時住一個月，我就喺嗰度（養和）住一個月，當時我屋企人都會有少少微言。我唔係話唔鍾意屋企人，而係嗰份緣份囉，好奇怪！」
有說蘇小姐本身富戶出身，又嫁了個富豪。她說：「第一我屋企唔係有錢，第二我唔會去借錢啦，根本梅姐就冇咁嘅需要（有傳她曾借錢給梅艷芳），啲報紙亂寫，都冇呢件事！」她說，老公本身是製衣廠商人，早年因肝癌過世。蘇小姐說自己不是富婆，但起碼生活無憂吧？「係啦，起碼我唔使去返工，我又唔使去照顧家庭，所以咪有時間囉，我啲時間好多就係去咗照顧梅姐， 一起身就算冇乜嘢都去咗佢屋企，夜晚又一齊食飯，你知佢一個人住，就算有司機助手，食飯都係嗰幾個人，佢有時會叫啲朋友嚟食飯。」
蘇小姐說，梅艷芳鍾意呼朋喚友，但大夥兒聚在她家中，梅艷芳卻選擇獨留房中，只要全屋熱鬧喧嘩就足夠了。食客三千，芳心卻寂寞，「佢係鍾意熱鬧，多啲朋友陪，有朋友嚟食飯佢就好開心，所以佢成日都話叫多啲朋友嚟食飯，叫啲朋友嚟打牌，鍾意玩啤牌就玩啤牌，佢自己就唔玩，見到你哋玩，佢自己就上咗房睇電視，耐唔中落嚟同你哋傾吓偈。」
愛情至上的梅艷芳，得知患癌後飛了一轉日本，與舊愛近藤真彥一聚，那個飯局，蘇小姐當然在場。「嗰次係03年5月，5月嗰時精神仲ok，冇嘢㗎！叫做大家去見返朋友。我聽佢講，我以為佢會講畀佢（近藤）聽自己有病，佢（梅）話冇同佢講，冇同佢講自己有個咁嘅病（子宮頸癌），所以後尾到佢走咗，我諗近藤嗰時都好shocked！（見舊愛了結心願？）我諗係啦嗰次，大家食餐飯傾吓偈，嗰時都好開心。」
如果香港女兒仍在生
作為超級歌迷，蘇小姐當然幻想過「如果偶像仲在生」這個問題，「我就諗如果佢仲在生，一來佢繼續演藝事業啦，繼續唱歌拍戲，或者另外一樣，可能又識到個人，結婚有兒有女，可能有自己家庭，或者已經唔喺娛樂圈，即係好似以前佢家姐（梅愛芳），都係結咗婚有細路，嗰陣時我哋都戥佢開心。嗰陣時佢家姐喺溫哥華，佢（梅艷芳）就係拍《奇蹟》嗰陣，咁啱喺嗰邊拍，佢家姐又住喺溫哥華，仲去探佢班，不過嗰次我就冇去。佢好開心，見到佢家姐嗰兩個仔，（𠵱家好大個？）好大個喇，唔知（近況）點呀，因為佢姐夫帶住兩個仔，不嬲都喺加拿大生活，阿Ann（梅愛芳）走咗之後，大家都冇乜聯絡，係梅姐走嗰時，佢（姐夫）有帶埋兩個仔返嚟，之後就冇再聯絡喇！」
歌迷心願很簡單，總希望偶像可以幸福快樂。梅艷芳2003年因子宮頸癌併發肺衰竭病逝，死時才40歲，如果仍在生，還有四年先「登六」。一代天后死後被稱為「香港的女兒」，蘇小姐說：「有呢個稱號畀佢都係好尊重同錫佢，內裏其實點解會咁樣叫，我又冇話點樣去深究呀，應該係好尊敬佢先有咁嘅尊稱！」
又如果，梅艷芳仍在生，身處此時此刻的香港，她會一樣撐學生？「始終都真係隔咗咁多年，就算佢𠵱家仲喺度，都唔知佢係咪繼續做緊娛樂事業，定係好似我話齋已經結咗婚嫁咗人，或者移咗民去外國……我都唔敢同佢講佢點樣諗，都唔出奇（撐學生）㗎！佢都會咁樣，佢覺得啱就會企出嚟，我諗佢個性格都會係咁！」
萬一，萬一像她的老友譚詠麟般去撐警？「我又冇諗呢啲！如果佢喺度，佢覺得邊面啱佢去撐邊個，佢自己嘅想法，我覺得唔啱，或者佢覺得啱！」
回想梅艷芳最開心的歲月，蘇小姐說：「我諗佢係攞咗新秀之後，事業就一路一路上，第一次就開15場演唱會，呢個我諗係畀佢一個好大嘅信心，同埋自己又鍾意嗰份工作，佢應該係嗰時最開心，除咗後期佢有拍拖，咁就有另外一啲開心啦，拍拖有拍拖嘅開心，但係我估攞新秀對佢嚟講好重要，呢個係改變咗佢人生！」
16年了，要記得的，永遠不會忘記，「我覺得冇淡忘到喎，始終你一講起，譬如以前六四呀民運各樣，甚至佢哋都會攞𠵱家呢個時候（情況），你以前做過啲咩，為社會為香港又好，你做過啲嘢呢，香港人係會記得嘅，唔會淡忘！」
後記：珠女
蘇小姐看着和梅艷芳的合照，一張一張翻開回憶，她的少女時代都與偶像在一起。她指着梅艷芳穿泳衣的照片說：「第一次見到梅姐着泳衣，嗰時同佢喺沙巴玩，梅姐除咗外面件恤衫，我仲好驚，（點解？）估緊有冇紋身（當年有傳梅的手臂有紋身），好彩冇咋！」
現在每年尾的30日，蘇小姐和歌迷都會到大嶼山拜祭梅姐，梅媽為女兒安放骨灰在大嶼山的「海會塔」，刻上「珠女」這個乳名。「真係整定，大嶼山寶蓮寺啲人，見到我哋好誠心成日嚟，有一個人忍唔住講，其實梅姐唔係擺喺寶蓮寺，係擺喺另一邊『海會塔』……有一個係珠女，我話，呢個一定係啦，因為梅姐有同我講過，佢乳名係叫珠女……有時啲嘢就係整定要畀我哋知！」