去到2019年最後一日，港台視點31喺fb出宣傳，話過去一年香港人飽歷風霜，每一日發生好多嘢，究竟乜嘢係真、乜嘢係假，點樣分呢？佢哋就以「真真假假2019」為題，作為視點31嘅2019年壓軸一集，仲講明「我哋有『真的假不了』陳志雲 VS 民建聯第二梯隊但輸咗畀素人嘅葉傲冬；藍絲KOL『正能量』楊官華VS『燒山』蕭若元」，一睇呢個陣容，單係燒山大戰華記正能量，成班網民已經話要準時坐定定睇。
點知正如個節目名，真真假假好難講，成班網民開心等睇大戰，到播出先發現唔係四人同台，而係各自講幾句，志雲大師同葉傲冬評價吓777同警隊；燒山同華記講吓點解可以成為紅爆KOL，網民睇到即時噓聲四起，明明港台fb講明有VS，點解變成各有各講？有網民話港台宣傳真係呃到人，亦有網民話估唔到2019年最後一fake，竟然會係香港電台！