踏入2020年，香港人戰鬥！我哋要做嘅事好多，由繼續爭取五大訴求到將抗爭融入生活追究警暴誓不罷休，然後相約煲底光復香港，為咗令大家唔好錯過任何重要行動同日子，八方整理咗個備忘錄提醒大家，總之時代革命尚未成功，我哋就齊上齊落繼續努力！
今日維園見
新一年第一大事當然係上街遊行，同一眾同路人今日下晝維園見！民陣今日遊行主題係「毋忘承諾，並肩同行」，經歷逾半年抗爭歲月，我哋失去唔少義士，大家曾經向佢哋承諾：「未完嘅路，我哋會代你哋走落去」，新一年，每一步，將會成為我哋兌現承諾嘅足印。
堅持五大訴求
「毋忘初衷」係2014年佔領時嘅核心口號，走過2019年，百萬港人嘅初衷毫無疑問係「五大訴求，缺一不可」；當權者全部答應嘅機會幾近無望，但大家要記住我哋係因為堅持先見到希望，冇可能「袋住先」，「如果我哋接受政府嘅條件，已經死去嘅朋友係唔會原諒我哋。」
全力反清算
呢半年香港人打出震古鑠今嘅抗爭戰，港共同中共束手無策，但佢哋冇打算放過我哋，年尾唔同嘅清算行動陸續有嚟，牽涉行業界別亦會更多更廣，但「咁樣係唔會令到我哋驚㗎」，港人要更團結反清算，一齊向噤聲說不。
抗爭融入生活
嚟緊一年大家要學習將抗爭融入生活。八方已經有朋友身體力行，只要黨鐵唔交出CCTV同動輒封站為警察服務，咪盡量坐巴士囉！仲有罷睇CCTVB，又學揸車學急救練體能勤健身，以備不時之需；亦可以學外語，喺做文宣時發揮作用，同向外國朋友講解抗爭緣由，我哋唔係Popo，唔會又唔讀書又唔做嘢呀！
登記做選民
去年區議會選舉我哋贏咗，2020年，如果你仲未係選民，即刻去登記吧！只要7月25號或之前滿18歲嘅香港永久性居民，就合資格喺今年登記，記得喺5月2日前交申請。另外，唔同界別人士同新成立嘅工會都要把握時機，盡早登記成為下屆特首選委會選民，向「我要真普選」呢個終極訴求邁進。
7.1上街
約定大家，半年後嘅7.1無論係咪已經光復香港，都要街頭見。現實係，大家唔知半年後會喺乜環境下遊行，甚至可能連遊行自由都消失，但八方更想見到今年7.1香港人係上街慶祝勝利，就算唔得，我哋仍然會風雨中同行。所以，唔好放棄呢個半年之約，直到公義來臨。
壯大黃色經濟圈
錢唔係萬能，但如果可以掌握經濟命脈，有錢就有更大話事權，仲可以集合更多力量對抗不義政權。黃色經濟圈漸漸形成，新一年我哋要鞏固唔同行業嘅產業鏈，除咗支持黃店，仲要學習認清中國製造，甚至實行賺藍錢，買黃貨，以消費方式表態。
緊記抗爭周年日子
由6.12煞停惡法到7.1和勇不分，加上7.21無警時分、8.31太子站事件、10.1港殤、11.18圍攻理大等等，暴政寫下的黑歷史罄竹難書，呢啲日子一定要銘記，因為2019年後，香港不再一樣，我哋一定要將呢一系列抗爭周年日寫入日程，提醒自己初心不改。
發展國際戰線
假如有一日，當Popo離開香港但係處處被拒入境，係咪聽到都興奮呢？2019年港人打開咗國際戰線，由國際登報、Twitter、IG，到世界各地連儂牆，港人抗爭血淚傳遞全球，成為全世界阻止暴政擴散嘅第一線。美國嘅《香港人權與民主法案》正式生效只算小勝，短中期目標，就係將濫暴Popo同港共高官權貴永世留喺大灣區。
保持警覺監察惡法
雖然我哋煞停咗一條惡法，但仲有好多惡法議題殺緊埋身，今個月就有紀律部隊加人工，散仔協會主席林志偉大總統已經打晒開口牌，唔滿意民主派抽出警隊加薪獨立審議，1月立法會隨時有硬仗。未來仲有《國歌法》、東北發展收地等爭議項目，當黎明仲未嚟到，香港人要寸土必爭。
成立及加入工會
總結抗爭運動經驗，各行各業都為反送中運動發聲，民間又自行三罷，可見唔同行動都要借助打工仔力量，為咗保障打工仔，組織工會必不可少，更何況當工會越來越多，隨時可以喺選委會勞工界別換來意外驚喜。
立會換屆投票
去年7.1人民攻佔議會控訴立法會淪為橡皮圖章，今年大家有機會用和平方式將出賣港人嘅建制派踢出議會，今年9月，請大家唔好外遊，喺立法會選舉日投下神聖一票。多你一個，真係好多！我哋不如約定再創奇蹟，重奪分組點票否決權，挑戰議席過半，在光復香港之前，先嘗試光復議會？
李八方