人到中年不少人會「滑牙」接受命運原地踏步，李家榮（火火）與李健宏（KB）兩位同年同月只相差8日出世的43歲中佬，卻沒有將心中創意撲熄，反而透過日常廢噏去啟發靈感組成中佬男子組合「雙龍出海」，並決定透過𢱑人幫手以零資金去開演唱會。兩人各出奇謀去𢱑幫手背後，造就一場機遇，讓一班苦無機會發揮音樂、創作、設計才華的人大展拳腳，兩位中佬在籌備中聽到一句又一句的感激說話，也為之動容。
掛住「冇大台，靠香港人」口號，火火與KB於9月組成名為「雙龍出海」中佬男子組合，更於網上專頁寫上「可能係第一隊萬人幫拖捧紅嘅中佬男子組合」。計劃以實驗性質進行，看看能否透過𢱑人幫手而成功於明年舉行首個演唱會。火火與KB日前𢱑到去葵涌一間Band房，希望𢱑到band友能義助為演唱會彈奏。面對住眼前的band友們，火火與KB先跟大家閒談了解背景，繼而邀請各位即席彈奏，KB露出驚訝表情問：「你哋咁勁，做乜要嚟呢度？」火火忍不住附和：「我仲以為今日嚟嗰啲係流，原來位位都係大師，令我原本諗住自己可以柴娃娃咁玩嘅空間都冇。」
最想背住老婆去滾
定下目標明年開騷，火火指對於雙龍出海絕對是大挑戰，他說：「一定冇大台，冇人畀任何錢，甚至乎硬件、軟件與money都唔會有，全部都靠我哋𢱑，今日𢱑樂隊，之後dancers、搣飛、first aider，所有要有都要𢱑。」KB指甚至平日宣傳拍攝工作，都是𢱑回來的義務團隊。當初構思時，他們不知道社會變成怎樣，只單純覺得香港這幾年來都充斥不快。「我哋兩個都係微不足道嘅小市民，如果我哋呢兩個咁嘅人靠𢱑都可以𢱑到演唱會，香港仲有乜係唔得，呢個係我哋想法。」
KB透露當初是閒聊間問火火：「你臨死之前有乜嘢未做過？佢話未唱過歌，我話不如搵隊組合玩吓啦。」火火笑住話：「我有兩樣嘢想做而未做，一個係成世都做唔到嘅開演唱會，點知講咗出嚟就話做。第二樣就係背住老婆去滾，呢樣係好想做，但最唔敢做，做唔到嘅，你係咪？」
音樂人呻苦無機會
籌備至今兩個多月，KB震驚透過網絡真的能夠找到幫手，火火被不少情景感動，他說：「有位幫我哋作主題曲嘅女仔，無端端講到喊，佢話『呢個時代，其實我哋好鍾意玩音樂，但我唔知點，冇機會畀人睇到、聽到，寄咗好多demo出去都石沉大海，但我估唔到有機會可以展示到首歌出嚟』。」他料不到原來過程中竟然幫到人，因為依他們人脈，做首歌放上網讓人留意根本沒難度，但這種小小的舉動，對好多人來說是渴求已久的夢想，火火說：「有人可以行出嚟表演，有人首歌可以出到嚟，有人設計出到嚟，就算用喺兩條蛋散身上，佢都感動到喊，覺得呢件事，由初初坐喺街頭廢噏，諗住玩吓，原來佢有第二啲意義喺度。」
撰文：馬建華
攝影：林賓尼