香港學校幾時開始普教中，左丁山唔記得清楚，隱約記得係田北辰任「語常會」主席年代嘅主張，當時「語常會」認為普教中可促進本港學生中文程度，但推行至今，有目共睹，普教中學校愈嚟愈多，學生中文水平普遍愈嚟愈差。講證據就容易啦，有幾位中文大學中文系校友成為中文補習天王，有啲出晒名，有啲低調行事，可以月租十萬元租住沙田獨立屋，佢嘅中大老師望塵莫及，得個睇字。若非市場有咁熱切需求，中文補習邊會咁好搵呀，幾十年前，左丁山嘅中大同學出去補習搵外快，英文系及理學院同學最吃香，文史哲學生想搵份補習都難。今時今日中文補習咁容易搵銀，就係表示中小學生嘅中文唔掂箒。
普教中導致或迫使學生外出搵中文補習，製造中文補習天王，誠非田北辰所能料及。田北辰母校男拔萃，聽講男拔附小係小一至小六都用廣東話教中文嘅。
一位老師話畀左丁山聽，現時學校有太多嘢要教，教育局根本不懂基礎教育最重要係語文同數學（即中英數），一味追求風尚，要求學校多用電子書，多用電腦，近兩年又要催谷STEM，直資有錢學校怕偏重一方，加多一個A（Art），於是變成STEAM教育，老師話變相成為「蒸氣教育」，蒸到一眾老師似人乾，唞氣都冇力，簡直疲於奔命，搞STEM要講銀紙，窮學校（如普通津貼學校）得個講字，喇沙書院小學搞STEM，買儀器，實驗室現代化，聽講都用咗三百萬元啦，地區津貼小學冇乜資格追上去？所以教育界貧富懸殊，推動STEM與電腦電子書，有極大digital divide，對平民學生極不利，教育局當睇唔到。其實在本欄多年前已講過呢類問題，那時候的牛津教科書出版主管麥嘉隆（Ben Mak）咪曾經在立法會為此與教育局副局長陳維安（現立法會秘書長）爭辯過囉。現在睇番，麥嘉隆完全啱晒，教育局只能死雞撐。左丁山多事問多一句，問老師：「你地如何分身搞STEAM教育？」老師話：「唉吔，益晒一啲近年新成立嘅教育顧問公司，老師冇時間去搞咁多嘢，啲富有學校一於out source，外判畀顧問公司代為策劃課程及提供軟件培訓，你識唔識開番一間呀？搵到錢㗎！」老師居然叫左丁山成立基金搵富豪投資者辦教育策劃及培訓，即是教育局政策鼓勵私企尋租活動！不過吾老矣，無能為力之，等其他人搵政府錢、教育錢啦。