【灣仔】現年54歲嘅郭富城自2017年同方媛結婚後，除咗工作外，幾乎將大部份時間放喺家庭上，尤其方媛今年4月為城城再添一名女兒Charlotte後，城城就由以往經常被影到跟好友張智霖同沈嘉偉等聚會，變成拖實老婆，或者抱女行街嘅相片。向來有打邊爐癮嘅城城，日前仲揸住新車載埋一家大細去灣仔食麻辣火鍋。
預埋外母
城城今次冇揸辣跑車，而係改揸新車落地冇耐嘅波子，事關車上除咗有「跟得夫人」方媛外，仲有外母同大女Chantelle。見到城城揸車離開寓所，當時佢以「安全車速」直抵灣仔利東街。泊好車後，城城第一時間行去後座打開車門，但警覺性甚高嘅城城先周圍望一望，隔咗一陣先示意Chantelle落車，當然城城亦第一時間抱實囡囡，就算外母打算幫手抱孫，城城都堅持親力親為，盡顯父愛。行去火鍋店期間，城城都一直抱着女兒，老婆方媛就負責照顧媽咪。
城城身為麻辣火鍋嘅VIP，兼且一家到場，老闆都第一時間到門口迎接，以往同朋友打邊爐，點都食番幾個鐘嘅城城，今次食咗個半鐘就走人，離開嗰陣發現有記者影相，城城笑笑口叫大家唔好影佢個女，對於怕唔怕囡囡受唔到麻辣火鍋味道，城城笑說：「帶佢出嚟行吓咋。」佢又話囡囡唔怕打邊爐嗰陣味。