呢個禮拜除咗英超有快車之外，蘇超都有波打，禮拜日就上演兩大班霸些路迪同格拉斯哥流浪嘅「老廠打吡」，結果格流作客以2:1力克些路迪，係近九年以來第一次喺客場砌低死敵，聯賽榜追到只係落後兩分，仲要踢少場。賽後格流領隊謝拉特非常激動，唔通喺利物浦失落嘅聯賽冠軍夢，可以喺格流以領隊身份兌現？
紅軍舊將先開紀錄
今場先有機會嘅都係主隊，格流嘅卡迪被指喺禁區內抆衫，球證直指12碼，不過基士堤主射就被老牌門將麥基哥撲出。大難不死嘅格流仲有後福，36分鐘由利物浦舊將賴恩堅特接應波拿巴列錫傳送禁區頂射入領先。不過臨完半場前些路迪中場卡林麥基哥嘅射門省中隊友奧辛尼艾度亞迪改變方向入網追平，半場打成1:1平手。
九年來首次客勝死敵
下半場兩隊互有攻守，56分鐘格流的波拿巴列錫開出角球，上半場犯下天條嘅卡迪頂入再度領先。雖然格流尾段有前鋒摩尼路斯插水領紅被逐，但最後都以2:1擊敗死敵，成功打破對手主場全勝金身。
今次格流作客贏波，除咗係謝拉特領軍之後第一次喺些路迪公園贏波外，亦係2010年後格流第一次作客砌低死敵，難怪呢位利物浦名宿賽後都極度興奮。家陣格流只係追到落後些路迪兩分，而且仲打少一場，大有機會過頭。賽後謝四大讚球隊表現，仲表示希望更多人可以注意到球隊今日嘅演出︰「我哋證明咗我哋有好球員，同埋係支好球隊，今場勝利好偉大，我哋已經好耐無喺呢度威過，希望更多人注意到我哋今日嘅表現。」
的確，自從格流12年破產降落第4級聯賽後，蘇超就得返些路迪一隊玩晒。雖然今季好似有得鬥下咁，但謝拉特都表示上年格梳年尾都贏過些路迪，但最後都係以九分之差輸咗冠軍，今季球員一定唔可以重覆犯錯，要繼續搏命先有機會推倒霸權。