香港人聖誕最富傳統係食聖誕大餐，兒童時代在旺角茶餐廳跟先父食（隔一兩年先有得食一次，視乎先父贏馬輸馬而定），隱約記得一餐係十元以下，所謂大餐其實就係幾道港式西餐，有得食已經好開心。
成家立室之後，帶仔女去酒店食聖誕自助餐，自助餐價每年加價，由三百幾一路加到七百幾至近乎一千，十個人食就花費近一萬，訂位又難，認真唔化算，前年諗起，訂位咁辛苦，不如走相反方向，改為食中餐，果然訂位容易，價錢便宜一半起碼，何樂而不為？成家人中午到陸羽飲茶，午後到上海總會開枱打牌直落，高興足大半日，物有所值。
是日與一位家人講起，佢話成班大學同學已三十幾歲，幾位有子女在2020年申請小一學位，正為揀學校煩惱，有乜咁煩？原來本港小學為追上教育局風尚，紛紛實行普教中，小學一年級開始用普通話教中文，默書用普通話讀，小學生有時聽到一嚿雲，寫錯晒啲字，有啲小學生返到屋企，媽咪叫讀一課書聽吓，學生用普通話讀得幾好，媽咪話：「用廣東話讀多一次，」點知學生有好多字唔識讀，媽咪為之暈得一陣。
呢家人話，現在好多80後家長想搵「粵教中」學校，一搵先至知道呢類學校愈來愈少，幾乎所有名校都已採用普教中，譬如住在沙田區嘅一位80後，搜尋好耐，先至搵到三間小學係粵教中，就是中文大學校友會聯會張煊昌小學，沙田官小及一間沙田官小附近嘅學校，但忘記了名字。呢位80後家長工程師A決定「大抽獎」填報沙田官小為第一志願，碰碰運氣。後來左丁山搵到工程師A問一問：「點解咁緊張要粵教中？」工程A話：「有兩個原因：第一，我唔想個女唔識用廣東話讀古文中文，學普通話唔困難，我讀完中學都識講啦，駛乜小一開始就用普通話學中文？其次，有學者研究顯示，普教中唔會提高學生中文水平，否則中學DSE唔會咁難，被學生視為死亡之科，近年香港學生中文差咗，我懷疑與普教中有關。仲有呢，今年六月以來嘅運動，令我對普教中有抗拒感。我不知此是否80後家長之普遍心聲呢。」左丁山之後諗咗一陣，急忙通知顯徑邨張煊昌小學校監游應森（聯合經濟系校友），話畀佢聽，張煊昌小學粵教中，可能係一個學校競爭優勢，會吸引到不少80後家長注意，將來收生會更多更好！沙田官小由政府教育局直接指揮，講唔定好快就會為政治服務，粵教中改為普教中也！