五大訴求其中一項就係真普選，但係北京同建制派成日話香港現在民主比97年前好，又話港英從來冇畀民主香港人，當然呢啲說法冇乜香港人信，但政務司長張建宗唔知係咪食咗誠實豆沙包，噚日公開承認香港係冇西方式民主。
張建宗噚日以「沉著應對 重建互信 走出逆境」為題發表網誌，其實八方估到內容都冇乜新意，又係來來去去叫盡快終止暴亂，唔係就影響經濟呀、要恢復社會秩序，只要重回正軌，香港可以浴火重生之類三幅被，當然民間五大訴求、真正雙普選就梗係唔提啦！
但張建宗仲好意思話「法治、人權、自由、司法獨立」係香港核心價值，之後仲加多句「或許香港沒有西方民主的全面外貌，但事實上香港長久以來一直不折不扣地享有真正及實質的自由」，言下意係香港就算冇真正民主，但香港人仲有自由喎！睇返半年反送中運動，香港人正逐一失去不同嘅自由：失去和平集會自由、戴口罩出街嘅自由、鬧濫權濫暴差人嘅自由、連學生喺學校外築人鏈自由都冇，呢啲唔通就係張建宗口中嘅香港人「實質的自由」？