無綫近日裁員，估唔到連89歲嘅朱維德（朱翁）都受影響。朱翁由1997年5月起開始主持嘅長壽節目《文化廣場》，原來噚日朝早9點播出最後一集。朱翁噚日接受電話訪問，對節目結束出奇冷淡，但講到無綫炒一成幕後人員，就有啲動氣，仲鬧爆：「我諗可能唔止喇，佢哋炒完都繼續做，咁無綫就越嚟越衰，走去買片返嚟算，可能內地或者台灣片。」係咪擔心缺乏香港地道文化？朱翁直斥：「𠵱家無綫唔講地道，無綫講錢。」
自薦節目被拒
朱翁自爆曾向無綫推薦節目但被拒：「其實我可以做好多節目，但無綫唔要我做之嘛！我可以做旅遊，佢又唔睬我，我到𠵱家都有搞旅行團，我返嚟話畀無綫聽，但佢哋唔敢做。我又認識內地一位茶王，書房好似茶葉博物館咁，我話人哋贊助仲要錢咩？佢哋話：『出鏡要錢』，我聽到都暈，真係嘥心機。」
朱翁曾主持《歡樂今宵》、《大江南北》、《體育世界》同《都市閒情》等節目，呢幾個節目都陸續收咗檔，明年6月約滿無綫嘅佢話暫時未有人搵佢傾續約，但有其他電視台傾過佢，問佢驚唔驚被雪藏？朱翁話：「有乜雪啫，我一個節目之嘛，每個禮拜得一集，一直得《文化廣場》一個節目，都係因為我鍾意藝術同音樂。」
撰文：馮仁昭