唔少港人短途旅行最愛返「鄉下」，即係飛一轉日本，身兼全國政協副主席嘅前特首梁振英，近日都到日本旅行。有《蘋果》讀者向八方報料，話噚日傍晚時分喺關西機場見到梁振英喺廉航香港快運check in，特別之處係佢哋坐架機嘅班機編號正係UO689，唔知係咪689特登揀？仲掛住做689票特首嘅日子？
阪急睇男裝褸
讀者仲報料，同行仲有「龍蝦太」梁唐青儀，以及三位子女包括傳昕、齊昕同頌昕。綜合讀者報料，喺等上機前689曾經笑住同一小朋友合照，而龍蝦太就冇乜表情咁，另一讀者就報料話，前日傍晚5點零鐘喺大阪阪急百貨8樓見到689，隨行只有一位保鑣，唔見龍蝦太，只見單拖689邊行邊睇電話，其間睇過男裝褸。
雖然話就話香港快運已經被國泰收購歸入旗下，但點都係廉航，689因乜唔搭國泰要搭廉航？後生仔又或普通市民就話貪機票平，689冇理由連因航經濟客位機票都畀唔起啩？佢月前仲高調批評部份反送中惡法嘅國泰職員，話冇一個乘客想政治走入機艙，又話國泰人員政治化是自尋末路，香港快運都算係國泰旗下，689「走入機艙」時，有冇擔心「自尋末路」呢？
李八方