臨近年尾，個個都搞回顧。美國《紐約時報》前日出咗一篇回顧文章，首次為佢哋嘅「周六人物誌」（The Saturday Profile）做回顧，精選三篇今年最好嘅人物特寫，仲附加濃縮版畀讀者重溫，其中一篇嘅主人公就係壹傳媒創辦人黎智英。
肥佬黎嗰篇特寫喺8月23號出，形容佢係香港知名商人中嘅異類，公開支持反政府示威，又唔畀面北京，佢喺訪問話自己係「有良心嘅搞事者」。值得一提係篇文話內地官媒成日笑佢肥，但佢唔算肥。
《紐時》話2002年開始推出嘅「周六人物誌」，所揀人物唔算全世界都識，但都係做緊啲好特別或者影響好深遠嘅事。另外兩篇精選特寫，一篇係關於加拿大一個唔信神嘅女牧師，另一篇就講阿富汗一個準備好隨時俾人暗殺嘅女市長。