【本報訊】西貢區議會20多年來一直受鄉紳操控，區選過後終帶來新景象。一直關注西貢近郊發展的「西貢鄉民」派出三人出選西貢區，全數報捷，當中只有西貢離島選區候任區議員陳嘉琳未曾遭遇襲、遭潑雞糞等「禮遇」。成功打倒巨人哥利亞後，陳嘉琳盼至少有一扇大門讓不同意見人士彼此了解，共建社區。
盟友接連遇襲 要避免落單
自西貢鄉民宣佈參選區選後，成員何偉航率先被人用棍圍毆至雙手骨裂，頭部縫針。另一成員梁衍忻的義工則遭潑雞糞，疑與選舉有關。作為區外人的陳嘉琳直言害怕，「驚，一路以來，義工唔會畀我自己一個喺西貢，總之我一入到嚟，一落車就要同佢哋講，要搵人接我」。街站又設有「保安」崗位，預防受襲。即使訪問當日，陳嘉琳擬獨自從十米外的甜品店會合記者，義工都不批准：「你自己去呀？唔得呀！」
義工的擔憂不無道理，佔地逾1.2萬公頃的西貢區在整場反修例運動中，只有一幅位於私人餐廳外的連儂牆，甚至連一幅抗爭橫額都容不下。陳嘉琳憶述有一晚和義工設計「六大訴求，缺一不可」的橫額時，一名大叔走上前對他們說：「你玩還玩，唔好玩呢啲嘢。」陳認為大叔並非恐嚇，而是「提點」，「講呢啲嘢會觸動某啲個人情緒」。經商量後，橫額擱置。「我哋未來幾年仲要不斷出聲講嘢，發表同佢唔同嘅意見，可能對佢哋嚟講有好大威脅，大家都驚」。陳嘉琳口中的「佢哋」是西貢的鄉事派，但她不會稱對方為鄉黑，反幫他們美言。「鄉事派基本上都好friendly，唔係元朗惡形惡相。」她解釋，西貢一向予人天堂和後花園形象，若有任何暴力事件，只會「攬炒」，「西貢係一個paradise，你一將呢個幻想破滅，啲人唔敢入嚟，就做唔到生意，所以佢哋冇辦法好惡。」擔憂直到選舉後漸漸消散，謝票時，一些原本支持建制政黨的店舖都突變得開通，稱樂意與年輕人傾談。
早於2009年已參與反高鐵保衞菜園村遊行，大學畢業後任職非政府組織，專門關注社區規劃，兩度為西貢郊野公園一帶發展提出司法覆核，西貢的將來，陳嘉琳總是念茲在茲。「西貢最主要問題係交通，無論乜政治立場都好，就係嗰條路（西貢公路）有問題，經常性塞車」。
提高居民城市規劃意識
熟悉城市規劃的陳嘉琳分析，塞車問題源於該區多了兩個新屋苑，還有一間國際學校。西貢公路擴闊工程只為將來可容納更多人口，絕非解決目前擠塞良方。再還原基本步，當原居民最初賣地予發展商時，未意識到將來會興建大量住宅，西貢根本吃不消，「原居民唔認識社區發展，當我賣塊地畀人，係諗自己賺十萬八萬，唔係諗一賣咗塊地，就起1,000間屋，呢個邏輯從來冇喺佢哋腦海出現」。昨日因結成今日果，當和原居民商討交通規劃時，眾人嘆息：「係囉，真係好差，起咁多屋做乜！」
規劃署早前建議就西貢兩幅用地改劃住宅發展，於南圍及響鐘一帶興建230伙豪宅單位，有原居民覺醒，於月中到北角政府合署抗議。作為當區候任區議員，陳嘉琳對於能否令政府撤回方案有保留，「區議會做到啲咩？改變到啲咩？我未係好肯定答到，佢始終係諮詢架構」。昔日保衞菜園村的小妮子今打倒哥利亞，改變社會初心始終如一，「企出嚟，唔係自己想像中咁恐怖，嗰個係一個門檻；企出嚟，可以做到好多嘢。」
■記者張雅婷