娛樂圈一向多是非，唔單止係幕前演出嘅藝人，幕後人都一樣勁多是非，好多時為咗自身利益，搞到反臉收場。好似識咗超過40年，喺娛樂圈輩份好高嘅「陽光」，一直被圈中人叫大佬，佢喺電視同音樂兩邊都好有地位，早年佢離開咗「老閉台」之後，去咗娛樂公司做話事人，不過幾年前佢又離開咗呢間公司，再入去公仔箱做CEO。
同陽光喺公仔箱出身嘅「船船」，過去幾年曾經轉過去其他台做管理人，之後又出去搞製作公司，成績都係一般，咁陽光份人好念舊，自己去公仔箱之後，專登搵埋船船一齊幫手，諗住好兄弟一齊拍住上。之但係唔夠一年，老闆覺得公仔箱使錢方式好似倒水咁賺唔番，於是閂水喉兼狂炒人，身為CEO嘅陽光都冇得留低。原來，陽光臨離開之前，船船同佢講明兩兄弟會共同進退一齊走，點知船船最後冇離開不特止，仲坐埋陽光個位，嬲到陽光成個人彈起，鬧爆佢係反骨仔，兩兄弟反臉收場。船船其實係想試吓做CEO滋味，所以用兄弟情嚟換呢個位，但係船船做咗揸弗人之後，公仔箱因為財困關係完全冇起色，船船地位當然岌岌可危。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。