意甲球會AC米蘭宣佈，38歲嘅老牌瑞典射手伊巴謙莫域以自由身再次加盟，同球會簽約到季尾，並擁有續約一年嘅優先選擇權。今次係伊巴事隔七年幾回歸意甲賽場，佢將會喺下年1月2日正式亮相米蘭，體測之後會同隊友進行首課操練，到時意甲球壇又多個風頭躉，除咗基斯坦奴朗拿度（C朗）之外，伊巴肯定係另一位充滿話題性嘅人物。
地標戰下月六日鬥森多
前日伊巴喺自己嘅社交媒體發佈咗張相當霸氣嘅相，宣佈自己回歸AC米蘭。張相係耶穌打扮嘅伊巴同一隻魔鬼拗手瓜，仲話：「一樣嘅伊巴，唔一樣嘅魔鬼，米蘭我嚟啦。」唔通暗示自己係神，將會打救AC米蘭？AC米蘭方面就為呢位瑞典射手整咗條片，展示一件印有伊巴名嘅波衫，不過就未有公佈波衫號碼，但佢當年喺AC着嘅11號，同慣常着嘅9號今季米蘭都名花有主。伊巴將會喺1月2日亮相米蘭，如一切順利，佢嘅「地標」戰有望喺下月六日主場迎戰森多利亞。
38歲嘅伊巴曾喺2010至12年效力過米蘭2季，其間上陣85場攻入56球，幫球隊贏過10/11球季嘅意甲冠軍。對於今次重投米蘭，伊巴就話：「返到我非常敬重嘅球會同深愛嘅米蘭市，我會同隊友並肩作戰去改善球隊嘅成績，我會竭盡所能去實現呢個目標。」目前米蘭喺意甲排第11位，今季17戰只贏得6場，入球更只得16球，場均唔夠一球，表現失色。
寸C朗投祖記唔係挑戰
向來霸氣敢言嘅伊巴，今次重返意甲一定會成為傳媒焦點，唔畀另一位風頭躉、現效力祖雲達斯嘅C朗獨佔鰲頭。講起佢兩個，C朗加盟祖記時講過轉會係因為渴望挑戰，伊巴喺今年一月接受訪問時就寸爆C朗：「加盟一支連續幾年贏得意甲冠軍嘅球隊根本唔算係挑戰，點解唔揀一支幾年前升班嘅球隊，慢慢幫球隊提升水平？咁先係挑戰！」不過，要睇伊巴大戰C朗球迷可能要等等，事關兩隊要去到出年四月先碰頭，睇吓伊巴嘅加盟可唔可以令米蘭隊友蘇醒，到時同C朗嘅祖雲達斯一決高下！