【堅守良知】
【本報訊】反送中的衝突現場，記者也在前線。一次運動，不止商戶要分藍黃，記者也被分黨分派，被認為是「紅媒」的編採人員，在抗爭現場往往受到特別對待：檢查記者證、打爛採訪車、要求交出記憶卡……有網民曾在討論區勸紅媒記者辭職，其實在所謂紅媒記者心中，留下的意義又是甚麼？《蘋果》訪問了四名現時於「藍媒」甚至「紅媒」工作的「黃絲」編採人員，一探他們的心態。
記者：周詠雯
四名受訪者都自認是黃絲，更有人自認「勇武」。與阿時（化名）的訪問，以他一句「報道只反映公司意見，不代表本人立場」開展。「你會問，點解你咁無骨氣，點解讀書人咁無風骨？」可以在黃媒工作固然最好，但現實是黃媒比較少，「最初想入行，但（黃媒）邊有咁多空缺？」
抗爭者對反送中運動的記憶，盡是催淚彈、警暴等畫面；而紅媒眼中的反送中，大概就是放大抗爭者暴力和撐警場面。在紅媒工作的阿革（化名），明言上司認為示威者暴力「好好睇，要落多啲」，遇上私了畫面，「就要描述得好多」。至於不時舉辦的撐警及愛國集會，有不少「重量級人物」，如譚詠麟和肥媽，「佢哋覺得好重要，就會寫得好長，同埋指示邊啲要行頭」。大概上司這些指示，就是新聞報道偏頗的因由。
港聞記者阿時的公司，可說是公認的親中報章。大字標題總是不乏「暴徒」兩字，抗爭者必是暴徒、示威必是暴動、共產黨必須讚美，公司同事亦有不少內地人。阿時平日亦會在衝突現場工作，「其實做嘅嘢同行家差唔多，警察、示威者都有影，但好明顯出到嚟就係警察受傷、示威者好暴力」。而公司在記者採訪前已有劇本，經常會指示放大示威者暴力畫面，「放大暴力之餘又要有新奇嘅角度」。
上層干預抹殺工作
另一名紅色網媒港聞記者、入行一年多的阿代（化名）直認公司政治背景取向鮮明，有關港獨的人物必會刪去、社評往往與抗爭者唱反調。因公司着重以衝擊畫面帶來點擊率，「咁梗係做得有幾激得幾激啦，佢哋係要以咁嘅mindset（心態）咁樣做」。「前線記者就算寫嘅嘢報道有幾中立都好啦，咁其實上層都總係有方法去干預到你嘅。」阿代形容這是對前線記者的大傷害。「我哋好努力咁去完成自己嘅工作，但到頭來去到最尾，呀，原來公司係可以將你嘅工作就咁拆散到一乾二淨」。因為有此安排，阿代亦認為公司完全推翻前線記者的努力。最令阿代印象深刻的，是在外採訪時有抗爭者發現他屬於哪個傳媒機構後，向他說「嘩你哋要如實報道呀！」阿代慨嘆，公司方針令市民對一個傳媒機構的信任完全瓦解。
在藍媒或紅媒工作已成事實，身為「藍中黃」及「紅中黃」的他們，就更希望盡力用不同方法抗衡。對於上司要求要有「新奇暴力角度」的相片等，阿時指「咪話人手唔夠，㩒唔到（相機）喎」，或是推搪現場情況混亂，「之後返去咪俾人鬧，你可以話咁樣係偷雞，但混亂都係事實」。
阿革的公司常被網民批評報道偏頗，身為編採部員工，他的「抗爭模式」就比阿時及阿命更為進取，當他改稿時發現有報道不太合理時，會先了解記者最初寫法，「採主或者再高層嘅人有無睇過、點樣改，原本嘅片、原本嘅料係點樣」，若他覺得有問題時，便會向上司反映。雖說進取，其實也是被動，因「老細本身都係聽（高層）話嘅」。「佢哋改唔改，亦都唔係我可以控制得到，有時就算佢哋肯改嘅話呢，其實本身個新聞已經係出咗街喇」。不過阿革亦偶有成功的經驗，亦是令他至今仍未轉職的原因。
「喺狹縫裏面努力」
不過阿革亦指，其實偏頗的報道並非每次均來自高層指示，「未必係啲政治任務，純粹真係（記者）能力不足」。阿革每次見到看似偏頗的報道，亦會盡力把關「睇下背後嘅原因」究竟來自高層壓力，抑或撰寫的記者亦墮入偏頗的陷阱中，「其實係好攰」。
至於在被人認為是「藍色網媒」工作的阿命（化名）亦會在工作時「偷雞」，馬鞍山早前有阿叔遭火私了，阿命的上司已要求同事以嚴厲措辭寫稿，「當然唔會去講呢個阿叔係抵死啦、先撩者賤啦」。而阿命的處理方法，亦只有平實地陳述事實，「唔會幫你寫示威者做暴徒，我亦唔標籤阿叔係藍絲」。不過阿命亦是較為幸運的一群，公司的報道雖然偶有立場，但仍未將抗爭者寫成「暴徒」，而前線記者不少也是「黃絲」，形容「𠵱家暫時仲可以喺狹縫裏面同同事一齊努力」。不過阿命強調，「如果公司一聲令下要我哋寫示威者做暴徒，我係一定會走嘅！」
反送中運動持續、港人愈見團結、黃色經濟圈亦逐步成形，外界對紅媒的指摘越來越多，「無良心」、「垃圾記者」、「出賣港人」之聲不絕於耳；更有網民在討論區留下「最後通牒」，批評為紅媒工作的記者「我哋恨不得你即刻仆街死」。這一切他們亦看在眼裏。四人之中，只有阿代辭職另覓新跑道。另外三人，至今仍在他人眼中的紅媒工作。
盼把報道寫得合理
「朋友當然係會問點解人仲留喺度啦！」阿革是四人之中在紅媒逗留最長時間的。「我會諗留低仲有無價值囉！」受着外界指摘，阿革亦不時問自己，是否仍問心無愧、是否仍助紂為虐。可能是過去向上司「成功爭取」的經歷，令阿革自言仍有份天真，「因為留低嘅話其實我仍然可以向上司發表吓意見、嘈吓佢哋；喺自己可以控制嘅範圍入面，就盡力（將稿件）拉返去比較合理」，加上現時公司需上司藍，但下屬黃，仍有相同理念的同事互相扶持，「可以繼續用𠵱家嘅信念去做」。不過阿革亦補充，如果有一刻認為自己已經出盡全力，仍要違背良心、忍無可忍時，便會毅然離開。
阿時的公司，問十個港人，大概有九個也會同意是紅媒。「咁做咩仲唔走？」記者問。阿時最初的回應是，「你有無睇過大時代？」記者狐疑。「如果身邊嘅人都污糟邋遢、你好憎，咁你點？我會諗辦法自己做嗰度最大嗰個。」阿時補充，自己深信多一支鏡頭，就多一份真相，「你留喺度，其實就係希望把握任何機會，讓事實、真實可以公正咁出到街」。
在訪問尾聲，阿時不忘說要用數句歌詞作結：「對，我犯賤，被流放，也像樂園。別勸我，我自願，未能半場棄權。」