前巴塞隆拿嘅恐佈MSN組合再次聚首!求大俠所講嘅唔係尼馬終獲轉會回歸魯營,而係呢位巴西球員喺上個禮拜五獲邀到蘇亞雷斯嘅家鄉烏拉圭,同美斯一齊出席哨牙蘇同老婆蘇菲亞嘅結婚10周年派對,只見三人仍舊友好高興合照,至於出席party嘅球員仲包括哨牙蘇嘅巴塞隊友布斯基斯、佐迪艾巴等,似乎尼馬仲未忘巴塞當年情呢!MSN曾聯手喺14/15至16/17年3季內,參加450場攻入364球,一齊贏過2次西甲及1次歐聯冠軍,威力都咪話唔恐佈。