俄羅斯一名26歲嘅女模特兒奧丁高娃，近日喺一個電視節目上爆料，指葡萄牙球星基斯坦奴朗拿度（C朗）曾喺ig上私訊佢，不過佢就冇畀C朗任何機會，仲話「直接刪除咗訊息兼冇回覆」。英國《太陽報》報道，呢位喺ig上擁有500萬名追蹤者、身材火辣嘅模特兒，近日受訪時就話：「C朗曾傳過訊息畀我，稱『Hi，你好嗎？』然後我就刪除佢嘅訊息兼冇回覆。」奧丁高娃解釋話，「自己聽到C朗同當時女友佐真娜訂婚，所以就冇畀C朗任何機會，我認識一啲同佢有聯絡過嘅女仔，所以即刻知道佢搵我係乜嘢事。」呢位俄國女模又稱，自己同F1車手咸姆頓係好朋友：「我電話入面最出名嘅人物係咸姆頓，佢最後一次發訊息畀我係11月15日，祝我生日快樂。我哋係朋友，曾互發訊息同傾電話，我哋成為好友已三年多。我都有同尼馬聯絡，我係通過咸姆頓識佢嘅。」