林欣彤前晚在旺角麥花臣舉行首個賣票的音樂會，除獲好友田蕊妮、吳業坤、許廷鏗及鄭欣宜等到場支持外，其緋聞男友、組合BOP成員歐喬鋒（Tyrese）也有低調捧場。
病到講唔到嘢
去年因聲帶發炎延期音樂會的林欣彤，前晚8時半穿上薄紗長裙赤腳步出舞台清唱試聲，之後換上閃片裙向觀眾打招呼：「真係等咗好耐。你哋有冇人買咗上年嘅飛？」台下即歡呼起哄。林欣彤其後請出神秘嘉賓林爸爸，她說：「佢係我成世人第一個同我唱卡拉OK嘅人，成日播歌、唱歌，仲彈琴畀我聽，今晚我想送一份禮物畀佢。」兩父女手拖手合唱張國榮的《今生今世》。唱畢，林欣彤與林爸爸在台上對話，她坦承很少向父母傾訴煩惱和壓力：「可能我喺佢哋面前逞強，想去保護佢哋，因為我真係好驚佢哋會擔心我，你哋放心，我會繼續堅強行落去。」她又分享經歷情緒病、失聲、生病的經歷，嚴重到連匙羹都拿不到：「上年呢個時候好瘦，因為受病魔煎熬，講唔到嘢，因為個身太痛，都有問自己點解要經歷呢啲。」之後她表示：「低潮一定會捱過，只係辛苦啲啫，希望大家加油！」尾聲時，觀眾兩度大叫encore，林欣彤獻唱《鳥籠》後與全場觀眾大合照，演唱會於晚上10時50分結束。
完騷後，林欣彤興奮說：「鬆咗一口氣，冇諗過second encore都咁多人。」她自爆綵排時看到爸爸唱歌，感動到哭：「揀《今生今世》，因為覺得今世有佢做我爹哋好幸福。」她表示會向紅館進發，聲帶已康復八、九成。
採訪：盧妹
攝影：仇志德