聖誕前，趕住去驗血量度三高、三脂甘油酸等等，以便同去年數字比較，是否有進退，還是維持平穩。私家醫生及私家化驗所效率奇快，星期三早上驗血，星期四醫生H已打電話嚟話出咗報告。問醫生H：「咁有乜要注意？」醫生H話：「冇乜啦，一切正常，膽固醇、三脂甘油酸都夠低，維他命D已升番上72，低過標準75一啲，但比去年之讀數49已大有進步。唯一要注意，就係叫你唔好食咁多好嘢，飲少兩杯紅酒，尿酸4.3，高於標準上限4.2，食少啲牛豬內臟啦！空腹血糖都唔曳，達標有餘。」
真好，又過一關，當然唔係靚到唔駛食藥，自2009年發現飲咖啡心跳之後，醫生驗出血壓高，唯有日日服食血壓藥，年半前又加埋膽固醇藥。於是LDL（低密度脂蛋白膽固醇，俗稱壞膽固醇）一下子急降，由3.36下跌至1.5。醫生話低得滯對腦筋唔好，於是放膽食靚嘢，點知尿酸又升番，真係得一樣，唔得一樣。以後到陸羽飲茶，或者唔再食全港第一嘅豬膶燒賣嘞。但佳節當前，唔食多啲點對得自己住？一於放懷大吃大喝，最多農曆年過後，餐餐吃麵包送清茶。
冬季食品最喜歡食臘肉膶腸，以前華豐燒臘在威靈頓街舊舖時代（還有七星伴月月餅應節之時），其臘肉臘腸令人垂涎三尺，現在不知是否做茶餐廳生意太好（域多利皇后街新店），臘肉等味道已不如前。近年多吃轉咗型嘅奇華臘腸，竟然有驚喜。呢個世界事在人為，奇華第一代在上海街專營舊式嫁女餅，第二代請設計大師靳棣強做rebranding加推新產品，成功轉型，第三代再主力強攻月餅及一般餅食，以至冬天臘味，又OK，可見俗語云創業難守業更難，未必成立，抱殘守缺，攬住舊招牌，梗係守業難啦，好似嘉頓麵包，以前在超市人人買嘉頓生命麵包，依家呢？不妨去city'super睇睇Little Mermaid，明明麵包價錢貴，但每次去買都要排隊畀錢。同是賣餅食，MBA導師可以將嘉頓與奇華之五十年故事寫成case study供學生研究！
聖誕又有不少小吃甜品，中午飲杯伯爵茶，最正係食件帝苑酒店Royal Garden出品蝴蝶酥，夠脆夠香口，家中九十歲長者都要食完又食，新鴻基地產之酒店群，最正就係呢間，食品一級。聖誕少不免吃朱古力，可能係最貴嘅，但一定最好食嘅就係La Maison du Chocolat，畀幾塊家中菲傭食，竟然驚呼：So delicious，比常在電視台賣廣告嘅朱古力，高出何止幾皮。小孩子要食硬果，上次到曼谷文苑，順手買咗兩盒爆谷mixed nuts，上星期一打開，家中第四代撲埋嚟搶，吃個不停，要強力制止，第三代又行埋嚟搶吃一空。