奧斯爾受中國杯葛，停播阿仙奴賽事，不准奧斯爾出場，有奧斯爾嘅話，阿仙奴球賽就在中國消失。北京話奧斯爾受假新聞誤導，誤解新疆，歡迎佢親自到新疆一行，了解實況。
呢一招「了解實況」係統戰招數之一，周恩來用到出神入化，1930年代共產黨捱打之時，招呼西方記者到「解放區」了解實況，毛澤東鐵腕統治中國時期，中央宣傳部有錢，更招待不少西方名人到大陸了解實況，幾乎次次成功，到訪外國人讚不絕口。到了今天，還是有不少海外華裔美國人、加拿大人（唔講華僑咁老套嘞）更易受感動，被招待到上海浙江等繁華之區參觀一級學校，與學生交流，直情感動到喊，說相形之下，香港學生係廢柴，美國學生係懶蟲。
奧斯爾其實可以欣然接受北京邀請，到新疆視察實況嘅，但要開出條件，准佢帶同BBC、CNN、半島電視台、土耳其、德國傳媒一同陪佢去，而且可以周街行，不受限制，可以同任何當地維吾爾家庭訪問、談話、談話時不要有監控設施（聲控、人臉控、電視控等等）在附近。
如是者訪問一星期，回到英國，奧斯爾開記招大讚中國進步開放，不歧視維吾爾族人，嘩，中國會贏盡國際掌聲，以後冇人敢再批評。中宣部、外交部、體育部，夠唔夠膽應承如此條件呀？如果訪問係樣樣由當局安排，奧斯爾去新疆做佈景板咩。
香港人三十年來捐錢到中國救災扶貧助學，不知凡幾，壹週刊創辦初期，為了捐款去華東賑災（大水災），肥佬黎夠膽唔找數畀印刷廠，一於拖住條數先，今天諗番起，好似係講神話（事隔多年，都唔算秘密咯，肥佬唔好見怪）。今日中國部份人一富起來，有錢大晒，反當香港人係窮阿燦，香港人要退避三舍，但香港人仍然知道一啲實況嘅。有位朋友繼續到中國某省山區扶貧助學，傳來短訊：「山區上的小孩居住和環境較差，那天送上鞋襪，因部份要跑兩小時山路才能上學，小腿凍得要命。有小女孩父母雙亡，由外祖母照顧，住的地方破爛，我們每月給200元贊助學費及生活費，這些小孩在山上也有不少。」不過，「小孩的眼神充滿希望，心中感動。」嗱，呢啲就係某些中國山區實況，並非上海一級中學小學有錢到設立AI實驗室咁巴閉。中國有錢投資幾千億至一萬億美元進軍一帶一路，而呢啲錢有不少流入當地某些人口袋，點解唔用錢大舉清除中國山區貧困兒童之學業問題呢？如此實況，你了不了解？