繼阿仙奴足球明星奧斯爾批評中國欺壓新疆維吾爾族人之後，一位紐西蘭欖球明星Sonny Bill Williams在Twitter發文，附圖顯示一隻染藍滴血的手給一隻染紅的手向下壓，藍色彎月係維吾爾族旗幟，紅色黃星代表甚麼，不用多言。
呢位威廉斯係國際欖球巨星，今年34歲，代表紐西蘭All Blacks參加世界盃欖球，在2011及2015兩奪冠軍，又曾經在紐西蘭打拳，係重量級拳王，十幾年來名震澳洲紐西蘭，現於加拿大打職業欖球，係Toronto Wolfpack球員。威廉斯嘅訊息係：「悲哀的是，經濟利益重於人性。」顯然係含蓄回應阿仙奴主動與奧斯爾行遠少少有關。
奧斯爾係土耳其裔德國人，信伊斯蘭，一啲都唔奇，所以佢嘅社交網發文係用土耳其文寫嘅，支持維吾爾族人，而威廉斯係紐西蘭人，做乜要回應？皆因威廉斯自幼貧窮，生活艱苦，讀書成績好一般，但極有體育天賦，打欖球、短跑、拳擊都勝人一籌，自幼發願為阿媽買一間屋，後來轉變信仰成為穆斯林，故此對維吾爾族人有一份同情。
欖球在中國係一個冷門運動，冇乜粉絲，故此內地沒有網民大罵威廉斯，央視杯葛阿仙奴之餘，對威廉斯及佢嘅球隊Toronto Wolfpack冇乜大反應，不似得阿仙奴球賽立即被央視禁播（不過近日又有喎，條件係奧斯爾冇出場就可以）。奧斯爾假假地都係技術高超球星，有狀態時直情係阿仙奴中場輸血管，現在阿仙奴成績低迷，再輸兩三場就陷入護級戰，粉絲難以接受。新教練阿迪達聲言以後用人唯勇，邊個上場唔搏命，唔操fit，不理名氣，一定冇得踢；之前舊教練一直雪藏奧斯爾就因為呢位球星打波懶懶閒，但體育界有句名言：「Form is temporary, class is permanent」奧斯爾有class，暫時缺form，如果佢為爭一口氣，要令阿仙奴為難，操到十足十，咁阿迪達出唔出佢呢？會否在換人一刻，中央電視台直播阿仙奴賽事之際，立即腰斬直播，貽笑國際？睇嚟阿仙奴為咗中國市場，好可能在明年1月將奧斯爾賤價出售，因冇大球會敢買，奧斯爾返回祖家跟土超都似。唔係講笑，足球圈有錢就大晒，中國最嚇人嘅，就係14億人市場，令全世界球會見錢跪低，超級巨星勒邦占士亦不例外。NBA咁把炮就話企硬箒，歐洲足協及各國聯賽就重視經濟利益多過自由、人權。強國民企不斷收購歐洲牌子（如FILA），牌子又會控制旗下贊助嘅網球、羽毛球知名球員，相信以後幾年，強國企業祭起大旗：順我者昌，逆我者亡。想食大茶飯，就要聰明一啲，不准越界，keep silent，奧斯爾講：silence on persecution is a form of persecution（對迫害保持緘默就是迫害的一種形式）。