西甲歇冬，球星四散去度假，當中巴塞隆拿前鋒蘇亞雷斯就籌備同老婆結婚10周年嘅慶祝活動，據悉美斯同尼馬都獲邀出席。MSN組合雖然已經拆夥，但阿蘇同尼馬仲好老友，所以後者同美斯都係阿蘇今次慶祝派對嘅客人之一。報道指阿蘇會喺烏拉圭小島開呢個慶祝P，原來阿蘇同老婆係青梅竹馬，兩人已經有2個仔1個女。