【公司專訪】今年本港零售業大受打擊，本地童裝品牌Chickeeduck創辦人周小龍接受本報專訪時指出，公司遭到部份商場追租、亦有銀行出信要求評估還錢能力，在逆境中「雪上加霜」。他坦言現時有兩至三間分店仍處蝕錢階段，「若明年持續便可能要關閉」。
記者：張雅琳
在全港各大商場經營17間分店的Chickeeduck，其創辦人周小龍表示，過往平均月賺700萬元，惟近半年生意持續下跌，於市況最差時期收入曾跌四成。「每間分店至少要賺25%才勉强算是有利潤，現時有兩、三間分店只係賺得5%，大概每年僅貢獻25萬，如果扣埋後勤成本，其實仲蝕緊。」
斥政府紓困措施緩慢
「不進則退」一向是周小龍的生意理念，以往若有更好、更前線的舖面，即使現舖僅裝修了三、四年，他亦會轉租更好的店址。惟他預料，根據政府過去六個月對各種訴求的消極不回應態度，政治問題未解決，明年零售業仍會低迷，「出年唔會太進取，賺唔到錢嗰幾間舖頭可能都會執。」比起過往的擴大市佔率，他認為儲錢作周轉更有必要。
市況不景，有商戶業主同意減租，惟眾多業主中，僅兩間向周小龍主動提出減租40%及15%。「你估都估唔到，竟然有兩間喺呢個時候仲要打電話嚟追租！」銀行業亦出名「落雨收遮」，雖然銀行沒有直接叫他還錢，但要求每月交多數份財務報告，方便銀行可及時判斷公司的還款能力。周小龍炮轟：「有時間我都叫辦公室啲後勤同事上前線幫手，減低請人成本，仲留喺度幫你寫報告？」另外，政府的辦事效率亦令他「嘆為觀止」，「6月宣佈推出中小企紓困計劃，12月先有申請指引，其間有幾多間店舖捱唔住執咗啊？」他希望，政府不要再做門面工夫。
北上經商難避免行賄
周小龍另一門生意，是在2017年開始，分別在重慶、長沙、成都開辦或接手溜冰場，但因為反修例運動，計劃一度暫停，「喺大陸做生意，你唔賄賂公職人員，你盤生意就做唔成。」他透露，曾經有內地部門刻意刁難，原因只是為了要收取一瓶酒跟一條煙的好處。他指，《逃犯條例》不清不楚，而北上經商行賄又無法避免，「上面一日未打貪成功，我都唔會贊成條例通過。」
對政治的不憤，亦反映在另一場選舉。周小龍曾是網球總會會長，事隔四年今年再次競選，惟最終落敗。周小龍認為，是次投票是小圈子選舉，自己是受到「建制派圍毆」。他表示，董事局及各總會成員多為城中權貴，「如果你唔埋堆，佢哋就唔摻你玩。」他指於一日前才收到通知會有兩分鐘時間向成員簡述政綱，而他的對手卻有20分鐘拉票，認為做法不合理，會作出投訴。