呢排班警察忙於洗白，郁啲就向傳媒發信或者出新聞稿，話傳媒呢樣寫得唔啱、嗰樣又寫得唔對，不過呢啲澄清好多得啖笑，全因咁多直播，市民有眼睇，你估Popo話係就係咩！但最荒謬嘅係，Popo已經進化到記者冇問佢就唔識澄清，仲要事後賴記者點解唔問佢哋！即係自己冇做嘢，但就係人哋錯呀！
唔澄清「失實報道」 怪傳媒唔質詢
話說噚日係拆禮物日，傳媒又收到來自Popo嘅「禮物」，又係話傳媒報道偏頗、抹黑警務人員警之類啦，佢哋晏晝喺facebook發片，警察公共關係科警司劉肇邦喺片入面話，上周五大埔翠屏花園開槍案後有傳媒採訪咗聲稱喺附近茶餐廳工作嘅目擊者，話見到警察拎走支槍同抹走槍上嘅手指模，於是責怪有主流報章同電台直接引述目擊者指控，「遺憾」記者冇求證就作出失實報道，令指控大量喺網上流傳喎。
但最精采係乜？Popo不滿喺現場見記者時，冇人向警方就呢點提出質詢喎！嘩，冇記者問，Popo就連澄清都唔識？劉肇邦話晒做過記者，咁都講得出？咁警察公共關係科有咩用？查實警方唔係冇機會澄清㗎，當晚冇澄清都算，之後星期一4點記者會有足夠時間畀Popo自問自答，亦完全冇提到，反而隔咗成個星期先出聲，唔通真係全部Popo唔使做？話晒高振邦、李桂華、er er sir每個月都拎十幾萬人工，冇理由辦事能力咁低啩？八方不禁質疑洗白工程係咪都要追quota，噚日冇料喺手，舊聞都要當新聞重提。
李八方