繼阿仙奴球星奧斯爾後，前韋斯咸領隊、𠵱家教緊英冠西布朗嘅比歷都為新疆面對緊嘅人權問題發聲，喺ig發文聲援維吾爾人，希望外界關注新疆人權問題。
早前奧燒喺社交媒體聲援維吾爾族人而激嬲中國，結果被中國封殺，網上搵唔到奧斯爾嘅關鍵字之餘，中央電視台都宣佈唔再直播阿仙奴賽事。不過咁做冇阻止到世界各地人士繼續發聲，今次就輪到克羅地亞籍主帥比歷，佢就唔怕強權，喺ig發文表明支持維吾爾族人，仲寫住：「面對壓迫，唔應該沉默！拯救維吾爾人！」，又用咗張諷刺中共壓迫維吾爾人，要禁止佢哋發聲嘅圖片。
中國班主未回應
不過，唔知比歷今次發聲會唔會被球會秋後算賬，事關西布朗班主原來係中國商人賴國傳，佢喺2016年以1.75億鎊（約18億港元）收購西布朗。不過暫時球會未有為比歷呢次事件發任何聲明，仲喺聖誕發佈咗條比歷祝賀球迷嘅影片。
比歷今季帶領嘅西布朗喺未踢今輪賽事前排緊英冠榜首，係聖誕冠軍，領先第2位嘅列斯聯3分。
除咗比歷，新西蘭欖球球星比爾威廉斯日前都喺社交平台批評中共殘忍對待維吾爾族人，形容中共重經濟利益多於人權嘅做法簡直係天理不容。