民陣發起1月1日元旦大遊行，主題係「毋忘承諾，並肩同行」，原來政圈流傳建制陣營都有團體喺1月1日發起撐警反暴力集會，但究竟乜人搞？似乎冇乜人關心，佢哋班建制派「人頭」最關心嘅係，究竟今次去集會一人有幾多車馬費？
日前係網上流傳一張相，有人係facebook發帖，話1月1日有反暴力反暴徒集會要人，時間係下午兩點，地點係添馬公園，仲寫明唔好着黑衫帶口罩，每人車馬費2,000蚊，可能怕人唔信，仲貼埋一大叠一千蚊紙嘅相！建制派搵「人頭」去集會唔係第一次，「人頭」有車馬費亦非新鮮事，但以往亦有人中伏，俾人呃咗個人資料，又或者去完冇錢收，而且每人有車馬費2,000蚊似乎高得不合理，伏味相當濃，八方覺得正當人家都係咪搵呢啲不義之財，萬一俾人呃，又或者有汗出冇糧出就相當唔抵喇！