呢兩日見到好多球星都post聖誕慶祝相上各大社交網絡，今日boxing day，唔知大家多唔多禮物拆呢。聖誕過咗，意味好快就到新一年，下年係2020年，好多傳媒都會做個10年總結之類，美國財富雜誌《福布斯》就統計咗過去10年最高收入運動員。結果呢10年雄霸足球界嘅兩大球王基斯坦奴朗拿度（C朗）同美斯，竟然只能分列第2同第3位，輸畀成日炫富嘅美國退役拳王美韋達。
買靚車賀阿女畢業
呢個統計包括運動員呢10年所賺嘅薪酬、獎金、花紅、商品代言費、出場費同註冊商標所得收入等等，美韋達雖然喺17年退役，而且過去10年只打咗約10場拳，但仍然以9.15億美元（約71億港元）居榜首。《福布斯》分析話呢位不敗拳王冠絕體壇主要係因為佢喺15同17年對帕奎奧同麥基格嘅世紀拳賽有超過五億美元落袋，而佢就喺社交網絡特登出post分享呢單新聞，話就話恭喜每位上榜嘅運動員，但似係想晒命多啲囉。唔知係咪心情靚又想使錢，聖誕期間用18萬美元（約140萬港元）買一架平治G63畀19歲阿女Lyanna，作為阿女畢業加聖誕禮物。
至於C朗以8億美元緊隨拳王之後，美斯就少C朗5,000萬美元排第3，分析就話美斯喺巴塞隆拿嘅年薪冠絕足球界，但輸畀C朗主要係因為對方商業贊助比較多。
奧斯爾繼續行善
美斯雖然喺呢個榜輸畀C朗，但聖誕一樣同家人慶祝得好開心，老婆喺ig放相，相中美斯同囝囝一樣着上一件紅白橫間套裝應節。另外，聖誕當日仲有好多球星同球隊更新社交網，好似皇馬就有班主佩雷斯拉隊同球迷報佳音，車路士就搞聖誕禮物交換派對，得罪中國嘅阿仙奴球星奧斯爾就善心回饋社會，之前承諾結婚時會為1,000名貧窮兒童負責手術費用，家陣就宣佈已經有219位兒童受惠。曼聯名宿簡東拿就關心自己舊東家，聖誕拍片語出驚人，竟然揶揄家陣嘅曼聯就好似老人家行房咁，好多時都有心無力，希望舊隊友蘇斯克查諗諗計。
