林鄭龜縮唔再搞社區對話，改為要唔同局長就住佢哋各自嘅政策範疇做fb直播，唔知係真儍定假天真，以為用個網就可以接觸年輕一代扮聽民意？點知反而出事，繼商務及經濟發展局局長邱騰華開Live做媒，再到勞福局局長羅致光個「處男Live」撞板，原來直播最高峯時都只得81個人睇緊，八方不禁諗，以羅致光加埋兩個同佢出鏡同事嘅人工，呢一個鐘節目嘅成本怕且以萬計，整個咁嘅直播得81人睇，真係成本同效益完全不成比例。
八方再計另一條數，當呢81個網民全部都係香港人，即係收視率只有0.001%，真係衰過亞視同CCTVB！究竟係呢個接觸市民手法有問題定羅致光吸引力出事？實情可能係why not both嘅！政府成日見網民、民主派開直播，拎住部手機拍就有一萬幾千人睇，以為自己有人有錢，冇理由唔掂，結果就係唔掂！不過八方就一定等保安局局長李家超開Live，除咗要同其他網民質問一番，最緊要應該係幫手嬲爆佢啲盲撐Popo廢噏言論。